Батальон хамандыырын көрүстүлэр

Спорка солбугу бэлэмниир өрөспүүбүлүкэ киинин дириэктэрэ, Украинаҕа бара турар анал байыаннай дьайыыга гражданскай ытык иэһин толорон эргиллибит Василий Иванович Егоровы СӨ физическэй култуураҕа уонна спорка миниистирэ Леонид  Спиридонов, Ил Түмэн физическэй култуураҕа уонна спорка сис кэмитиэтин бэрэссэдээтэлэ Михаил Гуляев, өрөспүүбүлүкэ спордун тэрилтэлэрин салайааччылара көрүстүлэр. “Триумф” спорткомплекс актовай саалатыгар атах тэпсэ олорон ыйытыыларга хоруйдаһан, истиҥ кэпсэтии, санаа атастаһыыта буолла.

Леонид Спиридонов бэйэтин эҕэрдэ тылыгар анал байыаннай эпэрээссийэҕэ баҕа өттүнэн тиийэн кыттыы улахан суолтатын, Василий Егоров киниэхэ сүктэриллибит батальон хамандыыра эбээһинэһин үрдүк эппиэтинэстээхтик уонна чиэстээхтик олорбутун, байыастарын сүтүгэ суох салайан аҕалтаабытын, спортивнай эйгэ аатыттан үтүө холобуру көрдөрбүтүн бэлиэтээтэ уонна Спорт министиэристибэтин Махтал суругун, кэнбиэри туттарда.

Ил Түмэн дьокутаата Михаил Гуляев эмиэ инники кирбии уоттаах толоонугар сылдьыбыт Василий Егоров үтүө патриотическай холобуру көрдөрбүтүн, ханна да буоларын курдук киһи быһыытынан эрдээх, бойобуой уонна үлэһит быһыытынан дьыалабыай хаачыстыбалардааҕын, өрөспүүбүлүкэ таһымнаах административнай-хаһаайыстыбаннай үлэлэргэ үрдүк эппиэтинэстээҕин, ол үтүө өрүттэрэ, ирдэбилэ, сатабыла улаханнык көмөлөспүттэрин тоһоҕолоон санатта уонна Ил Түмэн Бочуотунай грамотатын, өйдөбүнньүк бэлэҕин туттарда.

Байыаннай балаһыанньаҕа сөп түбэһиннэрэн лейтенантан подполковник званиетыгар тиийэ үүммүт Василий Иванович Егоров итии-истиҥ көрсүһүүгэ, үтүө тылларга махтанна. Күннэтэ кытаанах уонна олоххо кутталлаах балаһыанньа тирээн турара киһи өйүн-санаатын уларытарын, дьону кытта алтыһар, хамаандалыыр улахан эппиэтинэстээҕин, мүнүүтэ, сөкүүндэ аайы ыгыыга сылдьар уустуктардааҕын кэпсээтэ. Байыастары кытта тэҥҥэ сылдьан, бары биир киһи курдук ыарахаттары тэҥҥэ туоруур булгуччулааҕын санатта. Билигин контрактнай сулууспа, баҕа өттүнэн барыы бэрээдэгэ олохтоммутун, сыаллара-соруктара уратылаахтарынан мобилизованнайдары ыҥырыы тохтотуллубутун тустарынан эттэ. Саха сириттэн тиийбит байыастар бэрээдэги, дьиссипилиинэни тутуһалларын, толоругастарын, хааннарыгар баарын чорботон бэлиэтээтэ. Тыйыс айылҕаҕа тыыннаах хаалар туһугар олоро үөрүйэх байыастар туруоруммут сыалы-соругу толорууга бэлэмнээхтэрин, тулуурдаахтарын, спорка чугас, бэйэлэрин кыанар буолуу кытаанах санаалаах буолууга тиэрдэрин чорботон бэлиэтээтэ.

Василий Иванович Егоров эт-сиин өтттүнэн чиргэлэ, эдэр-эмэн саастарыттан кросс, хайыһар, каратэ, кикбоксинг курдук бойобуой искусство көрүҥнэрин эҥкилэ суох баһылаабыта, элбэх спорт маастарын, аан дойду чөмпүйүөнүн таһаартаан, РФ үтүөлээх тренерэ буолара түбэспиччэ буолбатах. Олоххо уһаарыллыыттан, буһууттан-хатыыттан кэлэллэр. Бэйэни кыана туттуу, дьону өйдөөһүн, байыастар кыһалҕаларын, наадыйыыларын толору билии, көмөлөһүү, байыаннай балаһыанньаҕа ытыктабылынан туһаныы биир күннээҕи дьыала буолбатах. Василий Иванович бэйэтэ этэринэн, ханна да тиийдэххэ, тустаах киһи патриотическай өйүттэн-санаатыттан, тылыттан-өһүттэн, тутта-хапта сылдьарыттан элбэх тутулуктаах, ким хайдах дойдутун таптыыра арылхайдык көстөр. Киниэхэ итэҕэйиллибит батальоҥҥа кыттыбыт байыастар бука бары дьиҥ геройдуу кыттан кэлбиттэриттэн киэн туттар. Онно хаалбыттар бары этэҥҥэ эргиллэн кэлиэхтэрин баҕараллар. Тус бэйэтэ барыан иннинэ икки ый “Боотур” кулуупка анал эрчиллиини ааспыт буолан, анал байыаннай дьайыылар буола турар сирдэригэр дьиҥ Боотур буолан тиийбитэ улаханнык көмөлөспүт. Барарга быһаарыммытын дьиэ кэргэнигэр эрдэттэн этэн, өй-санаа өттүнэн бэлэмнээбит. Долгуйуу да ханна барыай, баара, ону таба өйдөөбүттэригэр махтанар.

Василий Иванович Егоровы Ийэ дойдутун кыһарҕаннаах кэмигэр ытык иэһин толорон этэҥҥэ эргиллибитинэн эҕэрдэлиибит, махтанабыт, киэн туттабыт!