Бастыҥ учууталлар 100 тыһ. солк. кээмэйдээх бириэмийэни туттулар

Киин куорат үөрэх кыһаларын саха тылын, литературатын уонна төрүт култуура бастыҥ учууталлара 100 000 солк. кээмэйдээх бириэмийэни Төрөөбүт тыл уонна сурук-бичик күнүнэн туттулар:

Леонтьева Наталья Прокопьевна, «Сахалыы оскуолаҕа саха тылын, литературатын уонна төрүт култуураны үөрэтиигэ бастыҥ учуутал» номинацияҕа, Саха-политехническай лицей;

Попова Анна Даниловна, «Нуучча оскуолатыгар саха тылын, литературатын уонна төрүт култууратын үөрэтиигэ бастыҥ учуутал» номинацияҕа, 1 №-дээх оскуола;

Сысолятина Валентина Илларионовна, «Сахалыы уһуйаан бастыҥ иитээччитэ» хайысхаҕа, 16 №-дээх «Золотинка» уһуйаан;

Федорова Марфа Револьевна, «Нууччалыы тыллаах уһуйаан бастыҥ иитээччитэ» хайысхаҕа, 2 №-дээх «Олененок» уһуйаан;

Степанова Елена Ивановна, «Эбии үөрэхтээһин бастыҥ педагога» номинацияҕа, «Детский подростковый центр» эбии үөрэхтээһин киинэ.

Бу бириэмийэ олохтоноругар баһылык Евгений Григорьев уопсастыбаҕа уонна үүнэр көлүөнэ духуобунай сиэр-майгы өттүнэн сайдыытыгар учуутал оруолун бэлиэтээн туран ананарын ыйбыта, итиэннэ куорат оскуолаларын учууталларын уонна уһуйааччыларын бастыҥ уопута үөрэх атын кыһаларыгар туһанылларыгар эрэлин биллэрбитэ.

Санатар буоллахха, саха тылын, литературатын уонна төрүт култуура бастыҥ учууталларыгар бириэмийэни олохтуур туһунан Дьокуускай куорат баһылыгын 30п №-дээх уурааҕа 2023 сыл олунньу 13 күнүгэр баттаммыта.