Бастакы муниципальнай спартакиада кыайыылаахтара ааттаннылар

Ыам ыйын 18 күнүгэр «Туймаада» стадиоҥҥа СӨ физкултуурунай хамсааһынын 100 сылынан ыытыллыбыт куорат оскуолаларын ортотугар бастакы муниципальнай спартакиада үөрүүлээх сабыллыыта буолан ааста.
Куорат 53 муниципальнай оскуолатын  бастакы спартакиадатыгар спорт 15 көрүҥэр 5 бөлөҕүнэн 5307 оҕону хабыллыбыт. Үөрэнээччилэр баскетбол, волейбол оонньууларыгар, чэпчэки атлетикаҕа, хайыһарга, мини-футболга, остуол оонньууларыгар, буулдьанан ытыыга, дуобатка, саахыматка, боксаҕа, тустууга, кроссфит, мас-рестлинг, спортивнай ориентирование көрүҥнэригэр уонна «Эрэл» комплекснай нормативка күрэхтэспиттэр.
Хамаанданан зачетка түөрт бастакы бөлөххө кыайыылаахтарынан 2 №-дээх, 17 №-дээх, П.Н. уонна Н.Е. Самсоновтар ааттарынан Хатас агрооскуолата уонна 12 №-дээх оскуола ааттаннылар.
Бэһис, доруобуйаларынан хаарчахтаах оҕолор бөлөхтөрүгэр кыайыылаах үрдүк аатын 34 №-дээх анал коррекционнай оскуола-интэринээт иитиллээччилэрэ ыллылар. 
Спартакиада эһиилгиттэн сылын аайы ыытыллара былааннанар.