Бары бииргэ буолуохха

Сахая уонна Александр Бурнашовтар, эстрада ырыаһыттара:

- Пандемиянан сибээстээн быйылгы ыһыах онлайн буолар буолла, наһаа интэриэһинэй, хаһан даҕаны маннык ньыманан ыһыахтаабатахпыт эбээт. Ол эрэн хас биирдии Саха киһитэ араас ханааллар нөҥүө тэрээһиннэргэ кыттан, ыһыахтаабыт курдук сананыахтаах.

Туймаада Ыһыаҕа сыл аайы үрдүк таһымнаахтык ааһарын бэркэ диэн билэбит. Өрөспүүбүлүкэ араас муннугуттан элбэх киһи тоҕуоруһар, хас да түһүлгэнэн кэнсиэр бөҕө буолар. Биһиги артыыстар сыл ахсын 14-үс түһүлгэҕэ кэнсиэртиир этибит. Ыһыахха саамай үчүгэй таҥастарбытын, саамай бастыҥ көстүүмнэрбитин тиктэрэн, таҥнан-саптан, бар дьоммут иннигэр тахсааччыбыт.

Быйыл биһиги онлайн кэнсиэр оҥоробут. Син биир улахан кэнсиэргэ тахсар курдук бэлэмнэнэбит, олус долгуйабыт. Күндү көрөөччүлэрбит, онлайн кэнсиэртэри хайаан да көрөөрүҥ-истээриҥ диэн ыҥырабыт.

Сахалар сүрдээх тулуурдаах норуоппут. Дьиэҕэ олорорбут, тулуйарбыт олох кыра бириэмэ хаалла. Биһиги ыаллар ыһыахпытын сахалыы таҥастаах, эттээх, алаадьылаах, кымыстаах сандалы тула көрсөбүт. Санаабытынан, бэйэ-бэйэҕэ үтүө сыһыаммытынан, Ыһыах күн куйаар ситимин нөҥүө бары бииргэ буолуохха!