«Баҕарах» комплекс сүөһүгэ эбии аһылыгы бэлэмниир уонна үүт сүүрдэр тэриллэри ылла

«Баҕарах» сүөһү комплексыгар сүөһү эбии аһылыгын булкуйар анал тэрил кэлбит. Оборудование сүөһү аһылыга биир тэҥник булкулларын хааччыйарын таһынан, эбии компоненнары туттар кыаҕы биэриэхтээх. Саҥа тэрил СӨ Тыа хаһаайыстыбатын министиэристибэтин «Развитие кормопроизводства» бырагырааматынан атыылаһыллыбыт.

Оборудование Дьокуускайга кулун тутар ортотугар кэлбит, билигин бэрэбиэркэни бара турар. Тэрилтэ аны толору рационнаах эбии аһылыгы бэлэмниир кыаҕы биэрэр компоненнары күүтэр (жмых, зернофураж, премикс уо.д.а.). Бу компоненнар сүөһү эбии аһылыгын хаачыстыбатын, калорийнаһын үрдэтэр аналлаахтар. Иҥэмтэлээх эбии аһылык ынах сүөһү уопсай туругар уонна үүтүн хаачыстыбатыгар сабыдыаллыыра саарбахтаммат. 

«Горснаб» МУТ дириэктэрэ Петр Абрамов иһитиннэрэринэн, комплекс иккис блогугар 200 ынах турар миэстэтиттэн үүт сүүрдэр турбаны туруоруу саҕаламмыт, турбаны собуоттан кэлбит идэлээх исписэлиис таҥа сылдьар. Бэлиэтээн эттэххэ, бүгүҥҥү күҥҥэ пиэрмэ көһө сылдьар ыыр аппарааттары туһана турар. Саҥа оборудованиены кэлэр нэдиэлэҕэ, муус устар 11 күнүн эргин, үлэҕэ киллэрэр былааннаахтар. 
Петр Абрамов эбэн эппитинэн, үүт турбата ыанньыксыттар үлэлэрин лаппа чэпчэтэрин таһынан, бородууксуйа хаачыстыбатын биллэ үрдэтэр аналлаах.