Баһаартан сэрэхтээх буолуу ыйа ыытыллар

Балаҕан ыйыгар Саха сирин территориятыгар баар үөрэҕирии тэрилтэлэригэр үгэс буолбут баһаартан сэрэхтээх буолуу ыйа ыытыллар. Тэрээһин сүрүн сыала – оҕолору куттал суоһуур усулуобуйаларыгар хайдах сөптөөхтүк быһыыланарга бэлэмнээһин. Бу туһунан СӨ ЫБММ Кылаабынай управлениетын пресс-сулууспата иһитиннэрдэ. 
Сэрэтэр үлэ тэрээһиннэрин чэрчитинэн, «Неопалимая Купина» икона өйдөбүнньүк күнүгэр анаан Куораттааҕы классическай гимназия уонна 31 №-дээх орто оскуола 5-с кылааһын үөрэнээччилэрин ортолоругар ЫБММ регионнааҕы управлениетын сотрудниктара уонна «Всероссийское добровольное пожарное общество» регионнааҕы уопсастыбатын үлэһиттэрэ баһаартан сэрэхтээх буолуу туһунан аһаҕас уруоктары уонна викториналары ыыттылар.  
«Тэрээһиннэргэ 55 оҕо кытынна. ВДПО регионнааҕы уопсастыбатын старшай инструктора Диана Полятинскаяны кытта оҕолорго «Неопалимая Купина» икона устуоруйатын уонна ыксаллаах быһыы-майгы үөскээтэҕинэ хайдах буолар туһунан кэпсээтибит. Түмүккэ оҕолор баһаартан сэрэхтээх буолуу быраабылаларын төһө билэллэрин бэрэбиэркэлээтибит», – диэн кэпсээтэ СӨ ЫБММ Кылаабынай управлениетын салаатын старшай инженерэ Зинаида Дьяконова.