Бүлүү бөлөх улуустарыгар зондировщик-сөмөлүөт үлэлиэҕэ

СӨ Бырабыыталыстыбатын Бэрэссэдээтэлин бастакы солбуйааччыта Дмитрий Садовников улахан баһаары таһаарбат сыалтан Бүлүү бөлөх улуустарыгар зондировщик-сөмөлүөт үлэлии көтөрүн туһунан брифиҥҥэ биллэрдэ диэн Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрдэ.
Билиҥҥи туругунан Саха сиригэр биир ойуур баһаара баар. Баһаары  42 киһи уонна 3 тиэхиньикэ умуруораллар, Ан-2 сөмөлүөт уонна Ми-8 бөртөлүөт хонтуруоллууллар.
«Билиҥҥи кэмҥэ баһаар төрүөтэ биир – дьон тыаҕа, хонууга сэрэҕэ суохтук сылдьыытын түмүгэ. Онон нэһилиэнньэни өртөөһүнү ыытымаҥ уонна уоту сэрэхтээхтик туттуҥ диэн ыҥырабын. Өртөөһүн Арассыыйа Федерациятын сокуонунан бобуллар», – диэн бэлиэтээтэ Дмитрий Садовников.
Баһаартан сэрэхтээх буолуу сезона саҕаланыаҕыттан 128 га сиргэ 14 ойуур баһаара регистрацияламмыта. Ааспыт сылга бу кэмҥэ 12 тыһыынча га сиргэ 76 ойуур баһаара баара. 
Бүгүҥҥү күҥҥэ ойуур баһаардарын патруллааһыҥҥа уонна умуруорууга 9 салгын суудуната үлэлиир. 
Өскөтүн ойуур баһаарын түбэһэн көрдөххүтүнэ, суһаллык регионнааҕы диспетчерскэй сулууспа нүөмэригэр: 8-4112-44-74-76, эбэтэр ойуур харыстабылын быһа линиятыгар: 8-800-100-94-00 биллэриҥ.