Бөх тоҕор полигон сабыллар. Саҥа полигон үлэҕэ киирэрэ чугаһаата

Бүлүүлүүр суол 27-с км тутуллан эрэр бөх тоҕор саҥа полигон аны күһүн номнуо үлэҕэ киирэр туруктаах. Былырыын саҕаламмыт баараҕай тутуу хаамыытын ааспыт нэдиэлэҕэ СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников бэрэбиэркэлээтэ.
Полигон икки түһүмэҕинэн тутуллар. Бастакы уочарат полигон бары инфраструктурата уонна биэстэн икки бастакы учаастак оҥоһуллар. Онон номнуо бу сылтан саҥа полигон үлэлээн саҕалыыр кыахтаах. 
Дмитрий Садовников бэлиэтээбитинэн, төһө даҕаны үлэ график быһыытынан баран истэр, тутуу сезонун баттаһа эбии үлэһиттэри, анал тиэхиньикэни туруоруохха наада.
Полигон иккис түһүмэҕэ 2024-2028 сылларга олоххо киириэхтээх. Тутуу уопсай сыаната 3,7 млрд солк. тэҥнэһэр, бастакы уочарат сыаната - 2,4 млрд солк. Үбүлээччинэн «Комплексная система обращения с твердыми коммунальными отходами» национальнай бырайыак «Экология» бырайыагынан СӨ бүддьүөтэ буолар.
Дмитрий Садовников маны сэргэ Бүлүүлүүр суол 8 км саҕаламмыт бөҕү наардыыр ыстаансыйаҕа сырытта. Бу бырайыак «Айылга» тэрилтэ СӨ бырабыыталыстыбатын кытта концессионнай дуогабарынан тутуллар.
Ыстаансыйа сылга 150 тыһыынча туонна ТКО ылар кыамталаах. Ону 100% наардыыр кыахха таҕыстаҕына, полигоҥҥа быраҕыллар бөх иэнэ лаппа аҕыйыахтаах.
Бу икки баараҕай бырайыак өрөспүүбүлүкэҕэ бөҕү таҥастыыр промышленнас сайдыытыгар тирэх буолуохтаахтар, диэн Ил Дархан уонна Бырабыыталыстыба пресс-сулууспата иһитиннэрэр.