Бөдөҥ гостиница тутуллуохтаах сиригэр археологтар үлэлииллэр

Чернышевскай уулуссатын, 8/3 аадырыһыгар сотору кэминэн аныгылыы гостиница тутуллуохтаах. Бу күннэргэ куорат баһылыга Евгений Григорьев манна ыытыллар археологическай хаһыылары кытта билистэ.
«СӨ Арктикатааҕы научнай-чинчийэр киинэ» ГБУ научнай үлэһитэ, чинчийэр үлэни толорооччу Елена Соловьева бу миэстэ куорат историческай чааһыгар киирэрин бэлиэтиир:
_- Биһиги сабаҕалааһыммытынан, бу миэстэҕэ дьон номнуо 17-с үйэ бүтүүтүттэн саҕалаан олорбуттар. Биһиги сорукпут – кинилэр хаалларбыт култуурунай араҥаларын үөрэтии. Биллэрин курдук, 19-с үйэ бүтүүтүгэр – 20-с үйэ саҥатыгар бу сир аатырбыт иккис гильдиялаах атыыһыт Михаил Гаврильевич Васильев уһаайбатыгар киирэрэ. Оттон кини иннинэ манна ким олорбутун, туох тутууну ыыппытын үөрэтии – биһиги биригээдэбит соруга. 
_Билигин манна 35 киһилээх этэрээт үлэлиир: булумньуларын ыраастыыллар, испииһэктииллэр.
«Дьокуускай куорат XVII – XX-с үйэ саҥатынааҕы историческай чааһын култуурунай араҥата» аатынан биллэр эбийиэк билигин СӨ Култуура нэһилиэстибэтин харыстыыр департаменын көрүүтүгэр турар.
Археологтар балаҕан ыйын бүтүүтүн диэки үлэлэрин түмүктүүр былааннаахтар.