“Азия оҕолорун” оонньууларын уота саҕылынна

Кулун тутар 19 күнүгэр Ытык Өлүөнэ очуостарын тэллэҕэр “Азия оҕолоро” VIII-с Спортивнай оонньуулар уоттарын ылыы үрдүк тэрээһиннээхтик буолан ааста.

Алгысчыт сахалыы сиэринэн-туомунан аал уоту отунна. “Айхал-мичил, уруй-туску” тылларынан алҕаан, күндүлээн, көрдөһөн-ааттаһан, саҕыллыбыт ытык уот салгыы сылаас таба тириитэ таҥастаах кыра уол илиитигэр туттардылар. Уоттаах капсуланы сэрэнэн илиитигэр тутан, уолчаан спортивнай көстүүмнээх арыалдьыттары кытта киин түһүлгэ диэки хаамыста.

Хаамыы былаһын тухары диктордар “Азия оҕолоро” НИСО уонна уотун суолтатын, Оонньуулары 1996 сыллаахха Олимпийскай хамсааһын 100 сылын көрсө тэрийэн саҕалаабыт Саха Өрөспүүбүлүкэтин Бастакы бэрэсидьиэнэ М.Е. Николаев сүҥкэн оруолун кэпсээтилэр. Тыһыынчанан дьон-сэргэ  ортотугар тиийэн, уолчаан “Азия оҕолоро” оонньуулар сүрүн улахан салайааччылара-тэрийээччилэрэ кэтэһэн турар анал оҥоһуулаах үрдэлгэ тахсан, Саха Өрөспүүбүлүкэтин Ил Дархана Айсен Сергеевич Николаев, Арассыыйа Олимпийскай кэмитиэтин бэрэсидьиэнэ, Олимпийскай оонньуулар түөрт төгүллээх чөмпүйүөнэ Станислав Алексеевич Поздняков, “Азия оҕолорун» Норуоттар икки ардыларынааҕы кэмитиэтин бэрэсидьиэнэ Владимир Владимирович Максимов, Олимпийскай оонньуулар икки төгүллээх чөмпүйүөнэ, VIII-с “Азия оҕолорун” посола Вячеслав Александрович Фетисов илиилэригэр ылан, “Азия оҕолоро” Оонньуулар уотун араҥаччылааччыларга туттарбыттара дохсун ытыс тыаһынан бэлиэтэннэ. Тымныы, хаардаах сир ытык уота аан дойдуга саҥа Оонньуулар саҕаламмыттарын кэрэһитинэн буолуоҕа, кыайыыларга кынаттыаҕа!

Эҕэрдэ тыллар дуораһыйдылар. Аҕа Баһылык Айсен Николаев “Азия оҕолоро” Оонньуулар Саха сирэ, Арассыыйа бэлиэлэрэ буолалларын, аан дойду оҕолоро күрэхтэһэ кэлэллэрин, спортсменнар түмсэр сирдэринэн буоларбытын, ханнык да тохтото сатыыр күүстэр, санкциялар харгыстыыр кыахтара суоҕун, спорт барыбытын түмэрин, быйылгы “Азия оҕолорун” үрдүк таһымҥа ыытарга бэлэммитин, Арассыыйа бэрэсидьиэнинэн талыллыбыт Владимир Путины кытта иннибит диэки баран иһэрбитин; Владимир Максимов Оонньуулар улахан спорка кынаттыыр бастакы үрдэл буоларын, уот сылааһы, олоҕу, күүһү-уоҕу түстүүрүн, 100 күн устата уот Саха сирин бары улуустарын, оройуоннарын хабыахтааҕын, киэҥин-куоҥун, модун кыаҕын, түмсүүлээхпитин көрдөрүөхтээҕин; Станислав Поздняков ытык-кэрэ сиргэ уот ылыллыбытыгар, түмсүүлээхпитигэр, физкултуураҕа уонна спорка сүгүрүйэрбитигэр махтанна, оҕо спорда үүнүүнү-сайдыыны, күрэхтэһэр утарсааччыгар ытыктабылы, үөрүүнү-дуоһуйууну аҕаларын; Вячеслав Фетисов бу дьоро түгэҥҥэ кыттар олимпиецтарга улахан чиэс буоларын, олохтоох хамаанданы кытта  анаан-минээн хоккейга оонньуу кэлбиттэрин, бүгүҥҥү судургута суох кэмҥэ Оонньуулар “Азия оҕолоро” диэн саамай сөпкө ааттаммыттарын, күрэхтэһэр оҕолортон инникитин уһулуччулаах спортсменнар тахсыахтарыгар бүк эрэнэрин – бары үөрэ-көтө, өрө көтөҕүллүүлээхтик биллэрдилэр.

Арассыыйа уонна Саха сирин хоккейга табаарыстыы көрсүһүүлэрэ болҕомтону тарта. Арассыыйа хамаандатыгар хоккей “сулустара”, номоххо сылдьар Олимпийскай оонньуулар, аан дойду чөмпүйүөннэрэ, призердара  Вячеслав Фетисов, Андрей Коваленко, Борис Миронов, Алексей Гусаров, Вячеслав Буцаев, Евгений Давыдов, Сергей Шепелев, Ирек Гимаев, Саха сириттэн спорт миниистирэ Леонид Спиридонов, Өрөспүүбүлүкэ Аҕа баһылыгын уонна Бырабыыталыстыба Аппаратын салайааччыта Афанасий Владимиров, Хоккей оскуолатын дириэктэрэ Владимир Хисамутдинов, “Азия оҕолоро” оонньуулар дирекцияларын гендириэктэрэ Михаил Сивцев бэрт кичэллээхтик оҥоһуллубут муус балаһааккаҕа утарыта кииристилэр. Вячеслав Фетисов мүччүргэннээх түгэҥҥэ сыыдам-сылбырҕа хамсаныылары оҥортоон, олус наадалаах шайбалары киллэртээн, көрөөччүлэри үөртэ! Сүрдээх сэргэхтик барбыт көрсүһүү 6:6 ахсаанынан түмүктэннэ. Доҕордоһуу кыайда.

Быыһыгар оҕолор балаһааккаҕа киирэн оонньоон, улахан астыныыны-дуоһуйууну ыллылар.

Үөрүүлээх дьаһал оһуохайынан түмүктэннэ. Өтөрүнэн умнуллубат эриэккэс түгэн ааста.