«Азия оҕолорун» быыстапката аһылынна

Аан дойду оҕолорун күнүгэр «Арассыыйа – мин историям» музейга Норуоттар икки ардыларынааҕы “Азия оҕолоро” Оонньуулар историяларын көрдөрөр быыстапка аһылынна. Быыстапка Саха Өрөспүүбүлүкэтин Бастакы бэрэсидьиэнэ М.Е. Николаевка ананна.

Тэрээһин үөрүүлээх арыллыытыгар VIII Оонньуулар уус-уран салайааччылара, РФ народнай артыыһа, ССРС уонна РФ судаарыстыбаннай бириэмийэлэрин лауреата Андрей Борисов, Саха Өрөспүүбүлүкэтин култуураҕа уонна духуобунаска миниистирэ Афанасий Ноев, Саха Өрөспүүбүлүкэтин судаарыстыбаннай уонна уопсастыбаннай деятелэ Матвей Мучин, «Арассыыйа – мин историям» комплекс дириэктэрэ Дмитрий Соловьев, Саха Өрөспүүбүлүкэтин Бастакы бэрэсидьиэнин “Николаев-центр” Архыып-библиотекатын салайааччыта Юрий Семенов,  Саха Өрөспүүбүлүкэтин физическэй култуураҕа уонна спорка миниистирин I солбуйааччы Александр Бугаев, “Азия оҕолоро” Оонньуулар эдэр спортсменнарын ааттарыттан бастыҥ волейболист Алтан Афанасьев эҕэрдэ тыллары эттилэр.

«1996 с. диэри Саха Өрөспүүбүлүкэтэ 47 тас дойдуну кытта сибээстээх этэ, – диэн кэпсээтэ М.Е. Николаев бииргэ үлэлээбит соратнига, көмөлөһөөччүтэ уонна сүбэһитэ Матвей Васильевич Мучин. – Онно биһиги өрөспүүбүлүкэбит 300-тэн тахса экономическэй, научнай-тэхиньиичэскэй салааларга ыкса сибээстэри тутара. Михаил Ефимович элбэх тас дойду уһулуччулаах салайааччыларын кытта, кинилэр ортолоругар АХШ бэрэсидьиэнэ Джордж Буштуун, Кытай Норуодунай Өрөспүүбүлүкэтин бэрэссэдээтэлэ Цзян Цзэминниин кэпсэппитэ. Ол көрсүһүүлэр бастакы Оонньуулары тэрийэргэ олук уурбуттара. Тоҕо диэтэххэ арыы курдукка олороҥҥун, бэйэҥ эрэ баҕа санааҕынан Азия дойдуларын оҕолорун спортивнай оонньууларын кыайан тэрийбэккин. Ол да иһин Аан дойдутааҕы Олимпийскэй кэмитиэт, Арассыыйа Олимпийскай кэмитиэтэ биһиги бэрэсидьиэммит көҕүлээһинин ылыммыттара уонна өйөөбүттэрэ уонна 1996 с. бастакы “Азия оҕолоро” Спортивнай оонньуулар үрдүк тэрээһиннээхтик ыытыллыбыттара. Ону көрдөрөр билигин саамай тоҕоостоох, М.Е. Николаевы кэриэстээн, өйдөөн-санаан ааһарбыт саамай сөптөөх кэм”.

История салҕанар.