«Азия оҕолоругар» сахабыт сирэ хайдах кыттыаҕай?

Узбекистан, Казахстан, Белоруссия, Монголия, Армения уонна Арассыыйа регионнарыттан Уһук Илин, Сибиир, Кемерово, Урал, Саха Өрөспүүбүлүкэтин хамаандалара спорт 10 көрүҥэр күрэхтэһиэхтэрэ. Саха сирин хамаандата 7 көрүҥҥэ кыттыаҕа.

Күрэхтэһиилэр түөрт куоратынан ыытыллаллар: Кемеровоҕа – хайыһар, шорт-трек, хаҥкы, керлинг; Новокузнецкайга – шайбалаах хоккей уонна биирдиилээн маастарыстыбаҕа итиэннэ фигурнай хаҥкылааһын; Междуреченскэйгэ – хайаттан хайыһарынан түһүү спорда, хайыһарынан трамплинтан ыстаныы; Таштагол куоракка – сноуборд, фристайл, хаарга волейболлааһын.

Саха сирин дэлэгээссийэтигэр 70 спортсмен оҕо, 21 тренер, 7 бэрэстэбиитэл, 4 быраас, олор истэригэр Николай Полятинскай, Анна Антонова, Анна Иванова, Ольга Познякова бааллар. Дэлэгээссийэ салайааччыта Михаил Варламов. Сүрүн тренердэр хайыһарга Яков Попов, хоккейга Никита Дружинин, шорт-треккэ Станислав Никитин, фигурнай хаҥкылааһыҥҥа Дарья Андреева, хайаттан хайыһарынан түһүүгэ Артем Ермолаев, хаарга волейболлааһыҥҥа Анатолий Татаев уонна Туйаара Емельянова.

Лидердэр быһыытынан хайыһарга Инна Рыбкинаны, Кирилл Перевозчиковы, хоккейга Всеволод Зазулины, Владимир Глуховы, шорт-треккэ Семен Павловы ааттаталыахха сөп. Онон, ити оҕолорбутун кэтэһэбит.

Үбүлээһин кэмигэр быһаарыллан, хамаандалар өрөспүүбүлүкэ таһынааҕы эрчиллэр-бэлэмнэнэр түмсүүлэри (сбордары) көхтөөхтүк аастылар. Хоккеистар Сахалиҥҥа уонна Приморьеҕа эрчилиннилэр, билигин Новосибирскайга салгыы эрчиллэллэрин быыһыгар олохтоох хамаандалары кытта күрэхтэһэллэр.

Бөлөхтөрүнэн араарылланнар, хоккеистарбыт аан бастаан Уһук Илин, Кемерово, Казахстан хамаандаларын кытта оонньуохтара. Иккис бөлөххө Урал, Сибиир, Белоруссия күүтэллэр. Монголия, Кыргызстан, Узбекистан, Армения атын бөлөххө бааллар. Тренердэр үс иһигэр киирэргэ суоттаналлар. Шайбаны күүскэ охсууга, киллэриигэ, буллитка маастарыстыбаны көрдөрөр күрэхтэһиигэ эмиэ мэтээлгэ суоттаныы баар. Сахалиннааҕы “Азия оҕолоругар” Иван Чаишвили бастаан турар.

Шорт-трекистар Уһук Илин чемпионатыгар ситиһиилээхтик күрэхтэһэннэр, “Азия оҕолорун” оонньууларын кэнниттэн Бүтүн Арассыыйатааҕы күрэхтэһиилэргэ кыттар быраабы ыллылар. Семен Павлов мэтээлгэ тиксэригэр эрэл кыыма баар.

Хайыһарга ити үөһээ ааттаммыт оҕолорбут мэтээл иһин киирсиэхтэрэ.