«Азия оҕолоро» VIII-с оонньуулары көрсө икки спортивнай саала тутуллуоҕа

«Норуоттар икки ардыларынааҕы «Азия оҕолоро» VIII-с оонньуулары көрсө элбэх функциялаах икки спортивнай саала тутуллара, итиэннэ Н.Н. Тарскай аатынан «Туймаада» стадиону уларытан тутуу былааннанар», - диэтэ СӨ физическэй култуураҕа уонна спортка миниистирэ Леонид Спиридонов.

Билиҥҥи туругунан эбийиэктэри тутарга сир учаастактарын уонна бырайаһыактааһын докумуоннара оҥоһуллар. Эбийиэктэр Горнай улууһун Бэрдьигэстээх сэлиэнньэтигэр баар спортивнай саала курдук тииптээх буолуохтара. Икки этээстээх дьиэҕэ оонньуур уонна эрчиллэр саалалар, бокса саалата, душевой уо.д.а. бааллар.  

Норуоттар икки ардыларынааҕы «Азия оҕолоро» спортивнай оонньуулар Саха Өрөспүүбүлүкэтин бастакы Бэрэсидьиэнэ Михаил Николаев көҕүлээһининэн Саха сиригэр 1996 сыллаахха ыытыллыбыттара.

Быйыл «Азия оҕолоро» VII-с оонньуулар Владивостокка буолан аастылар. 2024 сылга Дьокуускай куоракка ыытыллыахтара.