«Азия оҕолоро» оонньууларга болҕомто күүһүрүөн наада

Ил Түмэн физическэй култуураҕа уонна спорка сис кэмитиэтин Михаил Гуляев бэрэссэдээтэллээх Ил Түмэн парламентскай истиитигэр бу сайын Владивостокка буолан ааспыт “Азия оҕолоро” спортивнай оонньуулар түмүктэрин уонна 2024 сылга Дьокуускайга былааннанар VIII-с “Азия оҕолоругар” бэлэмнэнии боппуруостарын көрдүлэр.

Сүрүн иһитиннэриилэри норуоттар икки ардыларынааҕы “Азия оҕолорун” кэмитиэтин бэрэсидьиэнэ Владимир Максимов, Саха Өрөспүүбүлүкэтин физическэй култуураҕа уонна спорка миниистирэ Леонид Спиридонов уонна Спорка солбугу бэлэмниир өрөспүүбүлүкэ киинин дириэктэрэ Василий Егоров оҥордулар.

Кэпсэтиилэр, сүнньүнэн, “Азия оҕолорун” Дирекциятын тэрийэргэ, 2023-2024 сылларга тутуулары ыытарга уонна сүүмэрдэммит хамаанданы бэлэмнээһин тула бардылар.

Урукку өттүгэр Оонньууларга түөртүү сыл бэлэмнэниилэр бараллара, билигин икки эрэ сыл хаалла. Онон кытаанахтык былааннаан, үчүгэйдик үбүлээн, оҕолор күүскэ бэлэмнэнэн кыттыахтарын наада. Пандемия мэһэйдээн, оҕолор 2020-2021 сылларга күрэхтэһиилэргэ кыттыбатахтара. Билигин күрэхтэһиилэргэ кыттыыны күүскэ тэрийэр сорук турар. Холобур, Владивостокка буолбут оонньууларга, Саха сирин оҕолоро күрэхтэһиилэргэ кыттыбаккалар, уопуттара суоҕунан, Олимпийскай эрэл училищета обсерваторга кубулутуллан, ону таһынан, Олимпийскай эрэл училищетыгар чэпчэки атлетика, тхэквондо, буулдьанан ытыы салаалара сабылланнар, ити көрүҥнэргэ билигин оҕолору бэлэмнээбэттэр.

Бу тирээн турар сытыы быһыыга-майгыга бэлэмнэниини күүһүрдэргэ болҕомто туһаайылынна. “Туймаада” стадиону реконструкциялааһын, Дьокуускай куоракка икки спортивнай сааланы тутуу ыытыллан уонна Аллараа Бэстээххэ саҥа улахан спортивнай комплекс тутуллан, спорт саҥа көрүҥнэрэ эбиллибиттэринэн, Бэстээххэ баар техникум базатыгар “Азия оҕолоро” оонньуулар кыттааччыларын күрэхтэһиннэрэргэ этилиннэ.

Бу туһунан Физическэй култуураҕа уонна спортка сис кэмитиэт, ол кэнниттэн Ил Түмэн улахан мунньаҕар көрүллэн, “Азия оҕолоругар” бэлэмнэнии боппуруоһа бигэргэтиллиэҕэ.