«Азия оҕолоро»: көрүҥнэр, бэлэмнэнии үлэтэ

Оонньууларга бэлэмнэнии хаамыыта СӨ Аҕа Баһылыга Айсен Николаев киэҥ ыҥырыылаах сүбэ мунньаҕар көрүлүннэ.

16 спортивнай объегы саҥардан тутуу уонна өрөмүөннээһин, көҕөрдүү, ырааһырдыы, тэрээһин үлэлэр, өрөспүүбүлүкэ сүүмэрдэммит хамаандаларын бэлэмнээһин боппуруостарыгар иһитиннэриилэр оҥоһулуннулар. Дьокуускай куорат 77-с кыбаарталыгар элбэх өрүттээх саҥа спортивнай саала үлэҕэ киллэриллиэҕэ. Университет “Сэргэлээҕин” түөлбэтигэр спортсменнар эрчиллэр, сынньалаҥнарын атаарар, култуурунай дьаһаллары, маастар-кылаастары, экскурсиялыыр бырагыраамалары ыытар Олимпийскай дэриэбинэ баар буолуоҕа.

Күрэхтэһиилэр 17 булгуччулаах спорт көрүҥэр ыытыллыахтара: 3х3 баскетбол, бокса, волейбол, көҥүл тустуу, дзюдо, кураш тустуу, чэпчэки атлетика, мас тардыһыыта, остуол тенниһэ, харбааһын, буулдьанан ытыы,  оҕунан ытыы, самбо, тхэквондо, мини-футбол, хапсаҕай, художественнай  гимнастика, ону таһынан стендэбэй ытыы, кик-боксинг, саахымат, үҥкүү спорда, дуобат Го көрүҥэ. Ити көрүҥнэргэ эбии «Алыш» курдаһан тустуу уонна хайаҕа ыттыы (скалолазание) киллэрилиннилэр.

СӨ физическэй култуураҕа уонна спорка министиэристибэтин бирикээһинэн “Азия оҕолоро” НИСО сүүмэрдэммит хамаандаларын тренердэрэ бигэргэннилэр. Сахабыт сирэ Оонньуулары ыытарынан икки хамаанданы туруоруоҕа уонна 20 спорт көрүҥүгэр күрэхтэһиэҕэ. Бу туһунан спорка солбугу бэлэмниир Киин дириэктэрин э.т. Михаил Варламов иһитиннэрдэ.

Тренердэринэн 3х3 баскетболга Екатерина Сперанская (кыргыттарга), Дмитрий Попов (уолаттарга); боксаҕа Василий Лисица (уолаттарга), Оксана Васильева (кыргыттарга); курашка Шагдар Гансух; хапсаҕайга Платон Саввинов; волейболга Айсен Жерготов (уолаттарга), Саргылаана Оконешникова (кыргыттарга); дзюдоҕа Илья Громов; кикбоксиҥҥа Сергей Охлопков; чэпчэки атлетикаҕа Татьяна Ариносова; сахалыы атах оонньуутугар Тимофей Слепцов; мас тардыһыытыгар  Дмитрий Саввин; мини-футболга Олег Марченко; остуол тенниһигэр Аркадий Иванов; харбааһыҥҥа Олег Лапшин; буулдьанан ытыыга Александр Сотников; көҥүл тустууга Кузьма Сивцев (уолаттарга), Александр Птицын (кыргыттарга); греко-римскэй тустууга Матвей Матвеев; сурдлимпийскэй тустууга Эрчимэн Макаров; самбоҕа Толибшо Ерасейнов; оҕунан ытыыга Ньургустаан Федотов (уолаттарга), Надежда Спиридонова (кыргыттарга); стендэбэй ытыыга Аркадий Андреев; тхэквондоҕа Яков Гаврильев; үҥкүү спордугар Павел Лопатин, Петр Черкашин; художественнай гимнастикаҕа Татьяна Шишигина; саахыматка Роман Ганжуров; Го оонньууга Дмитрий Корнев ананнылар.