Айсен Николаев Тулагы Киллэм саҥа амбулаториятын үлэтин билистэ

Былырыын ахсынньы ыйга Тулагыга «Доруобуйа харыстабыла» национальнай бырайыак иитинэн аныгы медицинскэй тэрилинэн, миэбэлинэн, каадырынан толору хааччыллыылаах амбулатория саҥа дьиэтэ үлэҕэ киирбитэ.
Эргэ мас дьиэ оннугар тутуллубут аныгылыы дьиэҕэ терапевт, акушер-гинеколог, ЭКГ кабинеттара үлэлииллэр, анаалыһы миэстэтигэр ылаллар, күнүскү стационар баар, процедура, быһыы эмиэ миэстэтигэр оҥоһуллар. Маны сэргэ атын исписэлиистэргэ аналлаах кабинет тэриллэн, чугастааҕы Жатай, Дьокуускай куорат Медкиинин исписэлиистэрэ кэлэн үлэлиир кыахтаахтар. 
Дьокуускай куорат Медкиинин кылаабынай бырааһа Евгения Маркова бэлиэтииринэн, саҥа балыыһа үлэҕэ киирэн, Тулагы, Сыырдаах, Капитоновка, Киллэм нэһилиэнньэтэ үөрүүтэ үгүс. Бу күннэргэ амбулаторияҕа Ил Дархан Айсен Николаев сырытта уонна киирэр суолу аспааллыырга, тиэргэни тупсарыы үлэтин ыытарга сорудахтаата.