Айсен Николаев кампус тутуутун көрдө

Цифровой технологиялары үөрэтэр «Школы 21» кампуска өрөмүөн үлэтэ түмүктэнэн эрэр, алтынньыга үлэҕэ киирэр диэн өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрдэ.

Ил Дархан Айсен Николаев кампус тутуутун көрдө-иһиттэ.

«Ойуунускай уулуссатыгар үс этээстээх дьиэҕэ өрөмүөн үлэтэ түмүктэнэн эрэр. Тутуу үлэтин суһаллык түмүктүүллэригэр сорудахтаатым», – диэтэ Айсен Николаев.

«Школы 21» кампуска араас хайысхалаах цифровой технологиялары үөрэтиэхтэрэ – алгоритмнары, графиканы, Unix, Web, мобильнай үлэлээһини, сетевой технологиялары, Big Data уо.д.а. Кампус үөрэнээччилэрэ ИТ-хампаанньаларга үс ыйдаах стажировканы ааһыахтара. Ол кэнниттэн бэйэлэрин хайысхаларынан үлэҕэ киириэхтэрэ.

Быйыл икки сүүмэрдиир түһүмэх ыытыллара былааннанар. Ол түмүгүнэн кыттааччылар сүрүн үөрэххэ киирэллэр уонна ИТ эйгэтин идэтин босхо баһылыыр кыахтаналлар. Үөрэххэ киириэн баҕалаахтартан сайт нөҥүө 3 000 сайаапка бэрилиннэ.