Айсен Николаев Дьокуускай куоракка оскуолалары тутуу хаамыытын билистэ
![Айсен Николаев Дьокуускай куоракка оскуолалары тутуу хаамыытын билистэ](https://kiinkuorat.ru/wp-content/uploads/2024/07/jyZxD4NrMl.jpg)
Бэс ыйын 20 күнүгэр Ил Дархан Айсен Николаев Дьокуускай куоракка тутуллар оскуолалары бэрэбиэркэлээтэ.
Ол курдук, Птицефабрика түөлбэтигэр 19№-дээх оскуола эбии дьиэтэ тутуллар. 326 миэстэлээх, 5,5 тыһыынча кв.м. иэннээх үс этээстээх саҥа эбийиэк үлэҕэ киирдэҕинэ, үөрэх биир симиэнэҕэ көһөрө күүтүллэр. Тутууну ыытар «Основа» ХЭУо гендириэктэрин э.т. Алексей Пестряков иһитиннэрбитинэн, эбийиэк быйылгы сыл төрдүс кыбаарталыгар үлэҕэ киирэрэ былааннанар.
Эмиэ 326 миэстэлээх, 5,3 тыһыынча кв.м. иэннээх эбии дьиэ Саха политехническэй лицейгэ тутуллар. Оскуола баҕатынан, бырайыакка планетарий киирбит. Манна эмиэ үлэ график быһыытынан бара турар.
Өссө биир 326 миэстэлээх, 5,8 тыһыынча кв.м. иэннээх үс мэндиэмэннээх эбии дьиэ Марха түөлбэтин 1№-дээх оскуолатыгар сыл төрдүс кыбаарталыгар үлэҕэ киирэргэ бэлэм. Эбийиэк үлэҕэ киирдэҕинэ, куоракка үлэлиир төрөппүттэр оҕолорун киэһээҥҥэ диэри оскуолаҕа хаалларар кыахтаныахтара.
Марха оройуонугар маны сэргэ саҥа үөрэх дьылыгар «Үөрэхтээһин» нацбырайыак иһинэн «Современная школа» региональнай бырайыагынан Кадеттар оскуола-интэринээттэрэ үлэҕэ киирээри турар.
Ил Дархан маны сэргэ 4 №-дээх анал (коррекционнай) оскуола тутуллар балаһааккатыгар сырытта. 4 966,46 кв.м. иэннээх, 180 миэстэлээх эбийиэк Пирогов уулуссатыгар тутуллар. Оскуола бырайыак-смета докумуона экспертизаны ааһан бүтэ илигинэн, болдьохтон хаалыы бэлиэтэнэр.
Айсен Николаев атырдьах ыйын 1 күнүгэр диэри тутуу дорожнай каартатын уонна эбийиэги 2025 сылга үлэҕэ киллэрэр былаан-графигы оҥорорго, итиэннэ тутуу үлэһитин ахсаанын 100 киһиэхэ диэри элбэтэргэ сорудахтаата.
«4 №-дээх анал (коррекционнай) оскуола бырайыак-смета докумуонун судаарыстыбаннай экспертизата хонтуруоллуур уорганнар ирдэбиллэрэ уларыйбытынан уһаата. Ону биһиги ПроШкола№25 федеральнай концессионерга, бэдэрээтчиттэргэ да иһитиннэрэн турабыт», - диэн бэлиэтээтэ Ил Дархан.
Дьокуускай куорат маастар-былаанынан 2030 сылга диэри уопсайа 12 оскуола уонна 18 оҕо саада тутуллара былааннанар, диэн иһитиннэрэр Ил Дархан уонна Бырабыыталыстыба пресс-сулууспата.
Сонуннар
Ордук ааҕаллар
![Түөһэйии элбээн иһэрэ дьиксиннэрэр...](/thumbnails/600/300/wp-content/uploads/2024/08/NNDIAGM5TA.jpg)
![Герман Отов: «Пригороднай аныгылыы улахан бөһүөлэк буолар чинчилээх...»](/thumbnails/600/300/wp-content/uploads/2024/09/inhECNdY5z.jpg)
![Баһылык Строительнай уокурук олохтоохторун кытта көрүстэ](/thumbnails/600/300/wp-content/uploads/2024/08/qRWAY5fveB.jpg)
![«Якутск вдохновляет» күрэххэ кыттыҥ!](/thumbnails/600/300/wp-content/uploads/2024/08/zc1WJpfgUt.jpg)