Арыылаахтар Сайылык күнүн, Пионерия 100 сылын бэлиэтээтилэр
![Арыылаахтар Сайылык күнүн, Пионерия 100 сылын бэлиэтээтилэр](https://kiinkuorat.ru/wp-content/uploads/2024/05/KOv2AvEqyl.jpg)
Самаан сайыҥҥа үктэнии бастакы күнэ. Чаҕылыйан күн да күн. Унаардаах алааспыт салгына сайа охсон, ахтыбыттыы кууста. От-мас, ходуһа, саҥа тыллан эрэр дыргыл сыта тарҕана, муннубутун саба биэрэр.
Хас лабаа эҕэрдэлэһэрдии суугунуу хамсыыр. Алааска киирэн иһэн көрдөххө, дьон-сэргэ үмүөрүһэ мустубут. Сыспай сиэллээхтэр тоҕуоруһа мустубуттара, хороҕор муостаахтар толоон устун мэччийэ сылдьаллара көрүөхтэн үчүгэйэ сүрдээх.
Кулууппут кыргыттара оллоону тула тураллара ыраахтан ураты көстүү буолан харахха быраҕыллар. Күлэн-үөрэн, мичээрдээн, саастаах дьоннорун утары кэлэн Сайылык күнүнэн, Саха сирин пионериятын 100-сылынан эҕэрдэлээтилэр. Бу манна үөрүүлээх күммүтүгэр дьоһун-мааны ыалдьыппыт Бүлүү куоратын бочуоттаах олохтооҕо, учууталлар учууталлара, 34 сыл пионерскай үлэни көҕүлээбит киһибит Наталья Дмитриевна Алексеева тахсан, биһиги үөрүүбүтүн үрдэттэ.
Аҕа баһылыкпыт Афанасий Афанасьевич Тимофеев тыл этэн эҕэрдэлээтэ, аал уотун аһатан алҕаата. Онтон тылы Наталья Дмитриевнаҕа биэрдэ.
Наталья Дмитриевна бэйэтин билиһиннэрдэ уонна Саха сирин пионерията 100 сылыгар аналлаах значоктары туттарда. Дьэ онтон толору астаах остуолга ыҥырыллан, бары сааһыланан олордубут. Хампабыт эр дьоно, аҕам саастаах дьоммут амсайарыгар анаан, сааскы эмис кустарынан күндүлээтилэр. Олору киллэрэн буһаран, итиилии миин кутуталаан аҕалан биэрдилэр. Кыргыттар олус минньигэс гына буһарбыттар.
Түгэнинэн туһанан Хампабыт эр дьонугар барҕа махталбытын тиэрдэбит! Өссө да сылын ахсын кус миинин иһэ, аҕам саастаах дьоммут Унаардаах эбэ хотуҥҥа тоҕуоруһа мустуо турдаҕа. Инньэ диэн туран бүгүҥҥү күммүтүн тэрийбит олохтоох дьаһалта үлэһиттэригэр, аҕа баһылыкпыт Афанасий Афанасьевич Тимофеевка уонна "Эрэл" сынньалаҥ киинин бары үлэһиттэригэр ис сүрэхтэн тахсар уйан махталбытын тиэрдэбит.
Бары дьоллоохтук олоруҥ, доруобай буолуҥ диэн алҕыыбыт.
Сонуннар
Ордук ааҕаллар
![Түөһэйии элбээн иһэрэ дьиксиннэрэр...](/thumbnails/600/300/wp-content/uploads/2024/08/NNDIAGM5TA.jpg)
![Герман Отов: «Пригороднай аныгылыы улахан бөһүөлэк буолар чинчилээх...»](/thumbnails/600/300/wp-content/uploads/2024/09/inhECNdY5z.jpg)
![Баһылык Строительнай уокурук олохтоохторун кытта көрүстэ](/thumbnails/600/300/wp-content/uploads/2024/08/qRWAY5fveB.jpg)
![«Якутск вдохновляет» күрэххэ кыттыҥ!](/thumbnails/600/300/wp-content/uploads/2024/08/zc1WJpfgUt.jpg)