Арыгыны сокуоннайа суох атыылааччылары кэтээн көрүү тохтообот

 Олунньу 28 күнүгэр кинилэр пиибэни уонна алкогольнай бородууксуйаны атыылыыр эргиэн эбийиэктэрин кэрийэн көрдүлэр. Тэрээһиҥҥэ Олохтоох дьаһалта Предпринимательствоҕа сүрүннүүр сэбиэтин  чилиэннэрэ кытыннылар.

Оробуочай бөлөх Мерзлотнай уул., 38 «Полюс» уонна Мерзлотнай уул., 28/2В «Курант» ас-үөл маҕаһыыннарыгар сырытта.

«Полюс» маҕаһыын пиибэнэн уонна алкогольнай бородууксуйанан «Мамонтенок» оҕо уһуйаанын таһыгар эргинэр, ити 2022 сыл ыам ыйын 6 күнүнээҕи 118-с №-дээх «Об определении границ прилегающих территорий, на которых не допускается розничная продажа алкогольной продукции и розничная продажа алкогольной продукции при оказании услуг общественного питания на территории городского округа «город Якутск» уурааҕын кэһиинэн буолар.

Гражданнар үҥсүүлэринэн «Курант» маҕаһыыҥҥа тиийэн, оробуочай бөлөх алкогольнай бородууксуйа атыытын булбата.

Бүтүн Арассыыйатааҕы норуодунай фронт активиһа Олег Маклашов ити икки маҕаһыыҥҥа сэрэтэр үлэни ыыппыттарын иһитиннэрдэ.

«Полюс» ас-үөл маҕаһыыныгар өйдөтөр үлэни ыытаары тиийбиппит, ону үлэһиттэр бизнестэрин харгыстыы сатыырбыт курдук өйдөөтүлэр. Итинник мониторинг тиһиктээхтик ыытыллар», - диэн бэлиэтээтэ Олег Маклашов.

Оробуочай бөлөх чилиэннэрэ быһаарбыттарынан, Олохтоох дьаһалта Предпринимательствоҕа сүрүннүүр сэбиэтэ бизнескэ үлэлиир дьон быраабын көмүскүүр.

«Ол эрэн предпринимателлэр сокуону булгуччу тутуһуохтаахтар. Итини сэргэ, куорат олохтоохторун итирдэр утахтарынан эргинии туһунан үҥсэллэригэр хаартыскаҕа түһэрэллэригэр, видеоҕа усталларыгар ыҥырабыт», - диэтилэр Олохтоох дьаһалта Предпринимательствоҕа сүрүннүүр сэбиэтин  чилиэннэрэ.