Арай биирдэ ойуурга

🌳Биирдэ ойуурга улахан иэдээн буолла. Таһынааҕы дэриэбинэттэн Сүрэҕэ суох Хаппытыан киирэн 9 тиити кэрдэн кэбистэ.

🪵Ити Хаппытыан сүрэҕэлдьээн дэлээнэҕэ барбатах буолуохтаах, оттор маһа бүтэн күрүөтүн баҕанатын эрбээн эрэр сурахтааҕа. Аны бу уоран кэрдибит тииттэрин халлаан суһуктуйуута салаасканан тиэнэн барар идэлэннэ. Дьэ, дьаабы буолбаат.

🐿🐰🐭🦊🦉🦆🐺

Ойуур кыыллара айманнылар, суһаллык мунньахха муһуннулар. Бастаан тииҥчээннэр ытаатылар - Хаппытыан кэрдибит тоҕус тиититтэн үһүгэр кинилэр уйаланан олорбуттар эбит. Туох баар астарын саппаастара, сылаас ньээкэ уйалара биирдэ Сүрэҕэ суох эрбиитин анныгар күр гынна. 

🐇Тииттэр сууллан түһэллэригэр Куобахтар уйалара кытта эмсэҕэлээбит, мутугун Хаппытыан онно тамнааттаабыт.

🐞Онтон тоҥон бабыгыраспыт хомурдуостар трибунаҕа таҕыстылар. Кинилэр кыһыҥҥы ууларыттан уһукталлара өссө балтараа ый баара. Бу алдьархай ааҥнаабытыгар утуйа сыппыт, хорҕойбут сидэриттэн таах таммаластылар, нэһиилэ быыһаннылар. Аны хайдах күөх окко диэри тиийэллэр?

🦌Кыыллар  бу эргин ойуурга кылаабынайынан талыллыбыт Тайаҕы ыҥыран аҕаллылар. Тайах бастаан "ээ, чэ, аҕыйах мас охтубутун аайы ыҥырдаххытый" диэн көрдө. Онтон мунньахха кыттыһан, уйата суох хаалбыт тииҥнэри аймахтаргытыгар дьукаахтаһыҥ диэн дьаһайда. Ону тэҥэ кыыллар ким туох кыахтааҕынан эриэхэ, хаппыт тэллэй хомуйан Саһылга туттарыҥ, кини туга да суох хаалбыттарга түҥэтиэҕэ диэн дьаһайда. Оттон хомурдуостар дьылҕалара салгыҥҥа ыйанна. Кинилэр кыыллар буолбатахтарынан сибээстээн, көмөнү эрэннэрбэтилэр, ол эрэн аһынан атын уйаларынан үллэһиннилэр. Баҕайылар саатар бытарыһан элбэхтэрэ да бэрт эбит.

🐻Оннук дьаһанан букунаһа сырыттахтарына, халыҥ тайҕаттан муҥур тойонноро Эһэ иһэрин туһунан сонуну аҕаллылар. Кини киһи мээнэҕэ ыарахан эмэһэтин хоҥнорон арҕаҕыттан тахсыбатах буолуохтаах. Арааһа нэһилиэк таһынааҕы сыбаалкаттан тугу эмэ тиҥсиринээри, эбинээри, таарыччы норуотун көрсөөрү гыннаҕа. 

🍃Бачча иэдээҥҥэ аны онно бэлэмнэнии буолла. Син онтуларын-мантыларын өрө тардыннылар, кыттыһан ас бэлэмнээтилэр, хонор ороҕун тэрийдилэр. Халыҥ тайҕаттан хааман кэлбит Эһэ үссэниэ, сыта түһэн сынньаныа буоллаҕа.

👊🏻Тойон Эһэ икки атахтаах дьалаҕайыттан эмсэҕэлээбиттэргэ биэстии бэс туорааҕын, дьиэлэрэ алдьаммыт куобахтарга уоннуу улахан тэллэйи, туга да суох хаалбыт тииҥнэргэ сүүрбэлии кедр эриэхэтин кэһии гынан аҕалбыт. Хаһан да босхо эриэхэҕэ тиксибэтэх тииҥнэр үөрээхтээтилэр. Куобахтар аатыгар эрэ махтаннылар, кинилэр тэллэйи улаханнык аччыктаатахтарына сиэччилэр. Бэс туорааҕар тиксибиттэр олох да тылларыттан маттылар, таах сибиэ Эһэни көрсөр тэрээһиҥҥэ аһынан кыттыспыттарын өйдөөн кэмсиннилэр.

👊🏻Эһэ кэлэн: 

 ⁃ Хоромньуну түргэнник туоратарга!

 ⁃ Туга да суох хаалбыттары өйүүргэ!

 ⁃ Хаһааҥҥытааҕар да күүстээх буоларга!

 ⁃ Ойуурга араас быһылаан тахсара элбээбитинэн, маннык түгэннэргэ туттуллар Пуонданы тэрийэбит, бука бары аһынан-таҥаһынан кыттыһан сыл аайы Саһылга туттараҕыт! 

- Сүрэҕэ суох Хаппытыаннартан сэрэтии үлэтин ыытарга - тииттэргэ сиртэн киһи үрдүгүн саҕа гына үрдүктээх тимир курбуулары оҥорорго!

 ⁃ Хомурдуостары, кинилэр кыыллар буолбатахтарынан сибээстээн, вообще суоҕунан ааҕарга! - диэн уураахтары таһаарда уонна сып-сап хомунан барда.

🍄Кыыллар саҥата суох кэҕиҥнээтилэр. Кэбис, утарыластахтарына Эһэ кинилэри киһилээбэт, таах тырыта-хайыта тыытар. Онон бардын эрэ диэн барытыгар сөбүлэһэн истилэр. 

✊🏻Этэҥҥэ өрүттэн, бэйэ-бэйэлэригэр көмөлөсүһэн, куобахтар орохторун сөргүттүлэр, тииҥнэри саҥа тииттэргэ көһөрдүлэр, хомурдуостары сайыҥҥыга дылы тоҥон өлбөтүнэр диэн бэйэлэрэ үллэһиннилэр.

✊🏻Норуот күүһэ - көмүөл күүһэ! Түмсүүлээх буоллахха ханнык да алдьархайтан самныбаккын.

https://t.me/kiin_kyorat_gazeta