Арассыыйа күнүнэн наҕараадалары туттардылар

Бүгүн, бэс ыйын 12 күнүгэр, Дьокуускай Орджоникидзе болуоссатыгар буолан ааспыт Арассыыйа күнүгэр аналлаах тэрээһиҥҥэ судаарыстыбаннай наҕараадалары уонна Арассыыйа пааспарын туттардылар.
Ол курдук, анал байыаннай дьайыыга эр санааланыы, бэйэни харыстаммат бастыҥ холобурун иһин рядовой Владислав Кондаков «За отвагу» мэтээлинэн наҕараадаланна, рядовой Элдьар Романов «Суворов» мэтээлин тутта.
Маны сэргэ Саха Өрөспүүбүлүкэтин социальнай эйгэтин сайдыытыгар көхтөөх уопсастыбаннай үлэтин уонна тус кылаатын иһин Ил Түмэн Дьиэ кэргэн уонна оҕо саас дьыалатыгар кэмитиэтин бочуоттаах грамотатынан Ольга Голдобина бэлиэтэннэ.
Итиэннэ бу күн сокуоннай саастарын ситэн Арассыыйа гражданина буолалларын туоһулуур пааспардарын үөрүүлээх быһыыга-майгыга өрөспүүбүлүкэ, Арассыыйа таһымнаах олимпиадалар, спортивнай күрэхтэһиилэр кыайыылаахтара уонна призердара, үөрэх бастыҥнара туттулар.