Анал байыаннай дьайыыга санитарнай массыына ыытыллар

Сиэнэ анал байыаннай эпэрээссийэҕэ кытта сылдьар гражданка Любовь Белоусова регион баһылыгар байыастар санитарнай массыына туһунан этиилэрин тириэртэ. Ол курдук, Саха сириттэн мобилизацияламмыт, 5-с аармыйа батальонун медсанчааһыгар сулууспалыыр байыастар медицинскэй тэриллээх санитарнай массыынаны ыытарга көрдөһөллөр.

«Биир Ньыгыл Арассыыйа» партия саха сиринээҕи салаатын сэкирэтээрэ Айсен Николаев Саха сирин байыастарыгар суһаллык тэрилинэн хааччыллыбыт санитарнай массыынаны ыытарга сорудахтаата. Ити күн тиэхиньикэ атыылаһылынна. Бу күннэргэ массыына Ростов –на-Дону куоракка тиксэриллиэҕэ.

«Саамай сүрүнэ, «Сахаэнерго» кэлэктиибин көмөтүнэн атыылаһыллыбыт санитарнай массыына, тустаах дьоҥҥо суһаллык тиэрдиллэрэ ирдэнэр. Ити үлэҕэ өрөспүүбүлүкэ Биир кэлим координационнай киинин кыттыһыннарарга көрдөһөбүн», – диэтэ Айсен Николаев.

Өрөспүүбүлүкэ Ил Дархана Любовь Андреевнаҕа хорсун сиэни ииппитин иһин махталын биллэрдэ уонна биир дойдулаах байыастарбытыгар барыта этэҥҥэ буоларыгар баҕарда.