Амырыын сыттаах күөх көбүөр тэлгэнэр

“Күөлбүт эмиэ сытыйан эрэр, ким дьаһайыахтааҕый?”  - диэн ааҕааччыларбыт ыйыталлар.

Бу күөл “Солдатское озеро” диэн ааттааҕын, арааһа, үгүспүт билбэт буолуохтаах.

Күөл Губинскай уокурук территориятыгар киирэрин иһин бастаан кинилэртэн ыйытабыт:

— Солдатскай күөл кытылын бөҕүн-сыыһын биһиги  муниципальнай дворниктарбыт кэмиттэн кэмигэр ыраастыыллар, ону тэҥэ хомус отун охсобут. Оттон уутун “Якутдорстрой” ыраастыахтаах.

Петр Копырин – “Якутдорстрой” тэрилтэ инженер-гидротехнига:

—  Өссө 2000 сыллаахтан куорат ханаалын Сайсары күөлүттэн саҕалаан Кальвица уулуссатыгар диэри трассата Губин уулуссатын устун уҥа диэки устара, салҕыы Чиряев уул. уонна Хабаров уул. тахсара, устунан боротуокаҕа түһэрэ. Номнуо баар 202-ис уонна оччолорго саҥа тутуллуохтаах 203-с микрооройуоннар икки ардыларынан устуохтааҕа.

2003-2008 сылларга ыытыллыбыт корректировка түмүгэр куорат ханаалын уута Кальвицаттан куорат боротуокатыгар диэри Сэбиэскэй Аармыйа 50 сыла уулуссаҕа баар шлюзтарынан түһэр буолбута.  Куорат ханаалын түмүктүүр кэрчигин хайысхата Хомустаах күөл нөҥүө барар гына уларытыллыбыта. Билигин оннук уста турар.

Сайсары күөлтэн Кальвицаҕа диэри  ханаал устата – 5300 м.

Сайсары күөл диэкинэн дириҥэ – 95 м.

Кальвицаҕа баар ханаал дириҥэ – 92 м.

Дириҥнэр араастаһыылара – 3 м.

Кальвицаттан Сэбиэскэй Аармыйа 50 сыла уулуссаҕа диэри устата – 5345 м.

Дириҥэтии үлэтэ Петровскай уонна Каландаришвили уулуссаларга баар муосталарынан оҥоһуллубута.

Солдатскай күөлү ыраастааһын туһунан эттэххэ, итиннэ уу хамсаабакка туран хаалар буолан сытыйар. Биһиги тула өттүн көрүүнү-истиини толорор эбээһинэспитин толоробут, хомуһун охсобут, бөҕү хомуйабыт. Ууга уста сылдьар бөҕү ыраастыыбыт. Оттон бүрүллэр чалахайын ыраастыыр үлэ диэн туспа көрүллүбэт.