Алтынньы 19 күнүттэн «Сүрэхпинэн кууһабын» аһымал аахсыйата саҕаланар

«Сүрэхпинэн кууһабын» тэрийээччилэрэ бырайыагы  «ураты эйгэҕэ мультисенсорнай квест» диэн билиһиннэрэллэр.

«Эһигини ураты эйгэҕэ ыҥырабыт, чуумпу уонна хараҥа умсугуталлар. Бу – бэйэни уонна тулалыыр эйгэни атыннык көрөр кыаҕы биэрэр. Уу-чуумпуга, гаджета суох хаһан олорбуккутуй? Хабыс-хараҥаҕа хайдах эбитий?», - диир бырайыак ааптара уонна сүрүннээччитэ, «Прогноз» АУо толорооччу дириэктэрэ Анна Федорова.

Бэйэни уонна тулалыыр эйгэни билии туонатын тэрийии идиэйэтэ быйыл муус устар ыйга саҕаламмыт. «Прогноз» АУо Дьокуускайга ураты дьон олохторун сырдатар, доруобуйаларыгар хааччахтаах дьон хайдах олороллорун чугастык билсэр музейы тэрийиини көҕүлүүргэ санаммыт.

Статистика көрдөрөрүнэн, өрөспүүбүлүкэбитигэр 58 тыһыынчаттан тахса инбэлиит регистрациялаах, итинтэн 7 тыһыынчаттан тахсата – оҕолор.

Бырайыак тэрийээччилэрэ бастаан салайааччылары кытта көрсүбүттэр – Өрөспүүбүлүкэтээҕи инбэлииттэр уопсастыбаларыттан Ирина Лебедеваны, Истибэттэр уопсастыбаларыттан Ульяна Максимованы, көрбөттөр библиотекаларыттан Айталина Корнилованы кытта. Ити кэнниттэн «Прогноз» АУо генеральнай дириэктэрэ Вадим Ильчук уонна куораттааҕы Киин библиотека систиэмэтин салайааччыта Мария Андреева бииргэ үлэлээһин туһунан сөбүлэҥ түһэрсибиттэр.

Бырайыак чэрчитинэн «СМАРТ» библиотекаҕа икки зона үлэлиэҕэ: экспозиционнай уонна экскурсионнай. «Слушая тишину», «Вижу свет», «Сила духа», «Цвет индиго» экспозициялар, ураты оҕолор төрөппүттэрин күннүктэрэ, «саҥарар» хартыыналар, сымнаҕас кинигэлэр баар буолуохтара.

Экскурсияҕа тыаһыыр мээчигинэн оонньуохха, эниэргийэ быраактыкатын баһылаабыт Евдокия Эйгэ медитациятыгар кыттыахха сөп.  

Бырайыак алтынньы 19 күнүттэн саҕалаан сыл бүтүөр диэри үлэлиэҕэ. Ити кэм устата нэдиэлэ аайы доруобуйаларыгар хааччахтаах ситиһиилээх дьону кытта көрсүһүүлэр, оҕолорго зоотерапия, кулинарнай, спортивнай, медиативнай маастар-кылаастар, хаартыскаҕа түһэриигэ үөрэтии уо.д.а. тэрээһиннэр буолуохтара.

Алтынньы  22 күнүгэр Паралимпийскай оонньуулар үрүҥ көмүс призердара, аан дойду уонна Европа чепионката Анастасия Диодоровалыын видео-сибээһинэн көрсүһүү ыытыллар. Сэтинньигэ Саха сиригэр инклюзивнай туризмы сайыннарыыга төгүрүк остуол, ахсынньыга эстрада сулустарын уонна «жестовай» ырыаны толорооччулар кыттыгас кэнсиэртэрэ буолуоҕа. Тохсунньуга Паралимпийскай оонньуулар икки төгүллээх боруонса призердара Степанида Артахинованы кытта ох саанан ытыыга кыттыахха сөп. Ити курдук, бырайыак ыйдарынан араас кэрэхсэбиллээх тэрээһиннэри ыытары былаанныыр.