Албыннаппыт дьон бырааба чөлүгэр түһэриллэр
Биллэрин курдук, Саха сиригэр уон оннук объект баар. Ил Дархан Айсен Николаев Саха Өрөспүүбүлүкэтэ Территориялары сайыннарыы федеральнай пуондатын бырагырааматыгар биир бастакынан киирэн, уон дьиэҕэ барытыгар дольщиктар бырааптарын көмүскээһин үлэтэ 2023 сыл бүтүөр диэри быһаарыллар турукка киирбитин иһитиннэрбит.
Ол курдук, уонтан алта дьиэҕэ 444 киһиэхэ компенсация оҥоһуллубут. 2022 сыл ахсынньы ыйыгар кыттыгас үбүлээһин суотугар икки объегы тутуу тиһэҕэр тиэрдиллибит, онон 57 албыннаппыт дольщик бырааба чөлүгэр түһэриллибит. Хаалбыт икки объект сыл бүтүөр диэри үлэҕэ киирэрэ, итинэн 209 дольщик бырааба чөлүгэр түһэриллэрэ хаалбыт. Бу – «Ильинка” дьоҕус оройуонугар 32 кыбартыыралаах уонна Автодорожнай уулуссаҕа 16 этээстээх олорор дьиэлэр.
Олорор дьиэлэри таһынан 2023 сылга булгуччу үлэҕэ киллэриллэр тутуулар реестрдэригэр биир гараас баар – моҥкуруут барбыт «Ессо-стиль» ХЭТ Поярков уулуссатыгар тутуохтаах оҕо спортивнай балаһааккалаах гарааһа. Бу тутууга албыннаппыт дьон бырааптара эмиэ 2023 сылы ааспакка өрөспүүбүлүкэ судаарыстыбаннай бүддьүөтүн суотугар чөлүгэр түһэриллиэхтээх.
Уопсайа 2018 сылтан бүгүҥҥэ диэри Саха Өрөспүүбүлүкэтигэр 15 проблемалаах объект үлэҕэ киирбитэ, 1183 гражданин бырааба чөлүгэр түһэриллибитэ – Саха Өрөспүүбүлүкэтин былааһын былааннаах үлэтин түмүгэ. Ол туһунан сонуну киэҥник көрдөрөр-иһитиннэрэр тиһиктэргэ СӨ Баһылыгын уонна Бырабыыталыстыбатын пресс-сулууспата иһитиннэрэр.
Фото Андрей Сорокин
Сонуннар
Ордук ааҕаллар
