Альберт Семенов байыаннай дьайыы зонатыгар көмө оҥоро тиийдэ

«Хомуллубут сириэстибэнэн анал байыаннай эпэрээссийэ чэрчитинэн судаарыстыба интириэһин көмүскүүр биир дойдулаахтарбытыгар УАЗ „Патриот“ массыынаны атыыластыбыт. Итиэннэ баҕа өттүнэн барбыт дьоҥҥо амуниция уонна сылаас таҥас аҕаллыбыт», - диэн иһитиннэрдэ уоппускатын кэмигэр байыаннай дьайыы зонатыгар тиийбит Дьокуускай куораттааҕы Дуума Бэрэссэдээтэлэ, «Биир Ньыгыл Арассыыйа» регионнааҕы политсэбиэтин чилиэнэ Альберт Семенов.

Итини таһынан, 1 мөлүйүөн солкуобайдаах спонсордар  хомуйбут сириэстибэлэригэр квадрокоптердары атыыластылар.

Дьокуускай куораттааҕы Дуума Бэрэссэдээтэлэ быһаарбытынан, көмө Саха сириттэн баҕа өттүнэн барбыт байыаннай сулууспалаахтар чопчу сайаапкаларын учуоттаан оҥоһулунна. Кини баһыылкалары, тиэхиньикэни уонна амуницияны «Боотур» этэрээт хамандыыра, «Барс-2» этэрээт хамандыырын солбуйааччыта Александр Колесовка туттарда.

«Инники кирбиигэ дойдубутун көмүскүүр дьоммут хаһаайыстыбаннай боппуруостарга аралдьыйбаттарын, болҕомтолорун сүрүн соруктарыгар ууралларын курдук, салгыы бары өттүнэн көмөлөһүөхтээхпит. Итиэннэ байыаннай сулууспалаахтар дьиэ кэргэттэрин өйүөххэ наада», - диэн бэлиэтээтэ Альберт Семенов.