Аан дойдутааҕы Сүрэх күнүн көрсө декада ыытыллар

Балаҕан ыйын 29 күнүгэр аан дойдутааҕы Сүрэх күнэ бэлиэтэнэр.  Бу күн, куорат олохтоохторугар сүрэх ыарыыларын эрдэттэн сэрэтэр уонна эмтэтэр наадалааҕын санатан, Дьокуускайдааҕы телевизионнай башня кыһыл өҥүнэн умайыаҕа.

Балаҕан ыйын 29 күнүгэр Доруобуйа харыстабалын министиэристибэтэ, Өрөспүүбүлүкэтээҕи уопсастыбаннай доруобуйа уонна медицинскэй сэрэтии киинэ, «Медик волонтердар» хамсааһын Дьокуускай куорат уопсастыбаннай миэстэлэригэр: «Туймаада» ТРК, «Проспект» АК, автовокзалга, аэропортка уо.д.а. сирдэргэ «Артериальнай хаан баттааһынын кээмэйдиир биир кэлим күн» аахсыйаны тэрийэллэр. Аахсыйа чэрчитинэн хаан баттааһынын кээмэйдииргэ үөрэтии, ВИЧ-инфекцияны бэрэбиэркэлээһин, туһааннаах буклеттары тарҕатыы, видеороликтары көрдөрүү ыытыллыаҕа.  

Медицинскэй тэрилтэлэргэ  сүрэх-тымыр ыарыыларын сэрэтиигэ туһуламмыт семинардар, ыксаллаах түбэлтэҕэ бастакы  көмөнү оҥорууга үөрэтэр маастар-кылаастар ыытыллыахтара.

Тэрээһин чэрчитинэн «Здоровое сердце семьи» Аһаҕас аан күннэрэ, үлэ кэлэктииптэригэр, үөрэх кыһаларыгар сылдьыы тэриллиэҕэ. «Здоровое Сердце» аахсыйанан медиктэр хаан баттааһынын кээмэйдиэхтэрэ, терапевт-быраас көрүөҕэ, саахар, холестерин таһымнарын бэрэбиэркэлиир экспресс-тест ыытыллыаҕа, ЭКГ оҥоһуллуоҕа, кардиолог сүбэ-ама биэриэҕэ.

Медиктэр Саха сирин олохтоохторун тэрээһиннэргэ көхтөөхтүк кытталларыгар ыҥыраллар.