Аҕа дойду Улуу сэриитин бэтэрээннэрин өйдөбүнньүк скверэ аһылынна

Бырайыак Сайсары уокуругун Управатын күүһүнэн, СӨ Үпкэ министиэристибэтин Олохтоох көҕүлээччилэри өйүүр бырагырааматын гыраанынан уонна Олохтоох дьаһалта, спонсордар көмөлөрүнэн олоххо киирдэ.

Билибин уулуссатын 49 №-гэр баар саҥа сквер тутуутун көҕүлээччилэрэ – «Победа» уонна «Заря» кооперативтар олохтоохторо.

Сквер үөрүүлээх аһыллыытыгар Дьокуускай кылаабынай архитектора Семен Сергеев, Сайсары уокуругун Управатын салайааччыта Владимир Слепцов, көҕүлүүр бөлөх салайааччыта, педагогическай наука хандьыдаата, СӨ үөрэҕириитин үтүөлээх үлэһитэ Светлана Семенова, Саха сирин үтүөлээх архитектора, «Якутпроект» институт генеральнай дириэктэрэ, сквер дизайн-бырайыагын ааптара Иван Шишигин, өрөспүүбүлүкэ норуодунай худуоһунньуга, Арассыыйа Худуоһунньуктарын сойууһун чилиэнэ, норуот маастара, сквер сэргэтин  ааптара Федор Марков, уопсастыбаннас, куорат олохтоохторо кытыннылар.

«Победа» уонна «Заря» даача кооперативтарын төрүттээбит Аҕа дойду Улуу сэриитин бэтэрээннэрин оҕолоро уонна сиэннэрэ кыттыылаах саҥа сквергэ алгыс сиэрэ-туома ыытылынна.

Олохтоох дьаһалта аатыттан Сайсары уокуругун олохтоохторун Дьокуускай кылаабынай архитектора Семен Сергеев эҕэрдэлээтэ.

“Эһиги көҕүлээһиҥҥитинэн уокурукка саҥа эбийиэк тутулунна. Саҥа уопсастыбаннай туона баар буолбутугар хас биирдии сыһыаннаах куорат олохтооҕор, уокурук Управатыгар, бэдэрээтчит “Строймонтаж-2002” тэрилтэҕэ махталбын тиэрдэбин. Дьокуускайга олоххо киирэр Бүтүн Арассыыйатааҕы “5 шагов для городов” бырагыраамаҕа маннык, олохтоохтор кыттар бырайыактарын биһириибит”, - диэтэ Семен Сергеев.

Бырайыак олоххо киириитигэр тус кылааттарын иһин Олохтоох дьаһалта махтал суруктарынан сквер тутуутун көҕүлүүр бөлөх чилиэннэрэ,  Сайсары уокуругун Управатын махтал суруктарынан көхтөөх олохтоохтор наҕараадаланнылар.

Сайсары уокуругун Управатын салайааччыта Владимир Слепцов бу миэстэҕэ Москва, Сталинград, Курскай иһин кыргыһыылар, Ленинград оборонатын, Белорусскай уонна Берлинскэй эпэрээссийэлэр кыттыылаахтара олорбуттара диэн бэлиэтээтэ.

«Билибин, Виктория, Ветеранскай уулуссалар олохтоохторо манна олорбут 200-чэ Аҕа дойду Улуу сэриитин бэтэрээннэрин туһунан сырдык өйдөбүлү үүнэр көлүөнэҕэ тириэртилэр. Сквер ааспыты, билиҥҥини уонна кэлэр кэми ситимниэҕэ, оҕону уонна ыччаты гражданскай-патриотическай иитиигэ холобурунан буолуоҕа”, - диэтэ Владимир Слепцов.

Сайсары уокуругун олохтоохторун аатыттан махтал тылы көҕүлүүр бөлөх салайааччыта Светлана Семенова эттэ.

«Көҕүлүүр бөлөх үлэтин бастакы эрэ түһүмэҕэ түмүктэннэ. Салгыы оскуолалар кылаас чаастарыгар, уруок таһынан дьарыктарыгар, бырайыактарыгар анаан бэтэрээннэрбит олохторун сырдатар методическай сүбэлэри оҥорор былааннаахпыт. Үгэстэрбитин харыстыаҕыҥ, историябытын умнубакка үүнэр көлүөнэҕэ тиэрдиэҕиҥ», - диэтэ кини.