264 байыаннай төрөппүтэ санаторнай-курортнай эмтэниини ааста

Саха сирин Ил Дарханын ыйааҕынан уонна атын нуорма-быраап аакталарынан анал байыаннай дьайыы кыттыылаахтарыгар аадырыстаах көмөнү оҥоруу тиһигин быспакка ыытыллар. 

«Бүгүҥҥү күҥҥэ өрөспүүбүлүкэ үрдүнэн 93 ыалга дьиэҕэ гаас ситимин тардыыга материальнай көмө оҥоһулунна. Маны сэргэ анал байыаннай дьайыы кыттыылааҕа 264 байыас төрөппүтэ санаторнай-курортнай эмтэниини аастылар, 247 байыас дьиэ кэргэнин бэрэстэбиитэлэ байыаннай эмтэниини ааһар сиригэр баран кэллилэр», – диэн иһитиннэрдэ кулун тутар 25 күнүгэр СӨ Бырабыыталыстыбатын бэрэссэдээтэлин солбуйааччы Георгий Степанов.

Анал байыаннай дьайыы 1500 кыттыылааҕа уонна кинилэр дьиэ кэргэттэрин чилиэннэрэ доруобуйа харыстабылын уонна социальнай хааччыйыы тэрилтэлэригэр реабилитацияны ааспыт, 173 киһи дьиэҕэ уонна тэйиччиттэн социальнай өҥөнөн туһаммыт. Георгий Степанов бэлиэтээбитинэн, Саха Өрөспүүбүлүкэтигэр олохтоох байыаннай дьайыы кыттыылаахтарын төрөппүттэрэ үс сылга биирдэ өрөспүүбүлүкэ уонна Москва «Бэс чагда» санаторийдарыгар 14 хонуктаах санаторнай-курортнай эмтэниигэ сылдьыахтарын сөп.
Социальнай көмө бу көрүҥүнэн туһаныан баҕалаахтар сайабылыанньаларын МФЦ эбэтэр e-yakutia.ru нөҥүө биэриэхтэрин сөп, диэн иһитиннэрэр Ил Дархан уонна Бырабыыталыстыба пресс-сулууспата.