2024 сылга тупсарыллар уопсастыбаннай туоналар: Рейтиннээх куоластааһын чугаһаата

Муус устар 15 күнүттэн ыам ыйын 31 күнүгэр диэри кэлэр 2024 сылга тупсарыллыахтаах уопсастыбаннай туоналары быһаарар Бүтүн Арассыыйатааҕы рейтиннээх онлайн-куоластааһын буолаары турар. Куоластааһын «Олорор дьиэ уонна куорат эйгэтэ» национальнай бырайыак чэрчитинэн ыытыллар.

Бэлиэтээн эттэххэ, 2019 сылтан «Куорат сиригэр табыгастаах эйгэни олохтооһун» федеральнай бырайыак иитинэн дойду үрдүнэн 1,8 тыһыынча уопсастабыннай туонаҕа тупсарыы үлэтэ ыытылынна. 

Рейтиннээх куоластааһын сүрүн сыалынан уопсастыбаннай туоналарын тэрийиигэ уонна тупсарыыга нэһилиэнньэни кытыннарыы буолар. Ол курдук, быйыл Саха сирин олохтоохторо 21 нэһилиэнньэлээх пууҥҥа 50 уопсастыбаннай миэстэҕэ куоластыахтара: Дьокуускай, Алдан, Томмот, Бүлүү, Ленскэй, Мииринэй, Удачнай уонна Нерюнгри куораттар итиэннэ Аллараа Кураанах, Сангар, Айхал, Аллараа Бэстээх, Чульман, Мохсоҕоллоох, Жатай бөдөҥ бөһүөлэктэр уонна Амма, Чапчылҕан, Улахан Аан, Павловскай, Нам, Даппарай сэлиэнньэлэр.

Куоластаан муус устар 15 күнүттэн 14.gorodsreda.ru онлайн-платформаҕа ыытыллар. Усулуобуйа быһыытынан, маныаха 14 сааһыттан саҕалаан ким баҕар бэйэтэ олорор сиригэр биир бырайыакка куоластыыр бырааптаах. 
Санатар буоллахха, ДОБРО.РФ сайтка билигин онлайн-куоластааһыны өйүүр волонтердары регистрациялааһын буола турар. Волонтердар сүрүн соруктарынан нэһилиэнньэҕэ бырайыактары билиһиннэрии уонна куоластааһыҥҥа кыттыыга ыҥырыы буолар, диэн СӨ Ил Дарханын иһинэн Архитектураҕа уонна куораты тутууга управление пресс-сулууспата иһитиннэрэр.