2023 уонна былааннаах 2024-2025 сыллар бүддьүөттэригэр чопчулааһыннары дьокутааттар ылыннылар

2023 сылга Дьокуускай куорат бүддьүөтүн дохуоттаах чааһа 26 569 мөл. солк. тэҥнэһээри турар, ол иһигэр нолуоктан уонна нолуогу таһынан киирэр үп иэнэ уларыйыыта суох хаалар – 9 724 мөл. солк.
Ол туһунан бэс ыйын 14 күнүгэр буолан ааспыт Дьокуускай куорат Дууматын уочараттаах 50-ус сессиятыгар куорат 2023 уонна былааннаах 2024-2025 сыллар бүддьүөттэригэр чопчулааһыннары көрүү боппуруоһугар Олохтоох дьаһалта Үпкэ департаменын начаалынньыга Ольга Максимова иһитиннэрдэ. 
2023 сылга дохуот кээмэйэ 26 569 мөл. солк. буоллаҕына, ороскуот кээмэйэ 28 385 мөл. солк. буолаары турар. 
«Сүрүн ороскуоттары төлөһөр сыалтан, 2023 сыл бүддьүөтүн диписиитин 789 мөл. солкуобайынан улаатыннаран, 1 816 мөл. солк. тиэрдиэхпит, ол эбэтэр нолуоктан уонна нолуогу таһынан киирэр үп кээмэйин 18,7 % тэҥнэһиэҕэ. Инньэ гынан диписиит кээмэйэ 8,1% буолуоҕа»,– диэн быһаарар Үп департаменын начаалынньыга Ольга Максимова.
Ольга Максимова бэлиэтээбитинэн, бары муниципальнай уонна ведомственнай тус сыаллаах бырагыраамалар ороскуоттара хаттаан көрүллүбүт. Ол курдук, бары 17 бырагыраамаҕа 26 226 мөл. солк. тыырыллар, ол эбэтэр ороскуот 92,4% ананар. Оттон бырагыраамаҕа киирсибэт хайысхаларга 2 159 мөл. солк. тыырыллыбыт, ол эбэтэр ороскуот 7,6%.
Саамай элбэх үп «Үөрэхтээһини сайыннарыы» муниципальнай бырагыраамаҕа эбиллибит – 792 мөл. солк., ол иһигэр:
– бүддьүөттэр икки ардыларынааҕы трансфертар суоттарыгар 579,0 мөл. солк., ол иһигэр:
* судаарыстыбаннай боломуочуйанан хамнаһы үрдэтиигэ эбии 271 мөл. солк. кээмэйдээх субвенция харчыта;
* 2023 сыл бастакы аҥаарыгар оскуола иннинээҕи саастаах оҕону көрүүнэн уонна харайыынан дьарыктанар дьоҕус уонна орто урбаан бэрэстэбиитэллэрин өйүүргэ ананар субсидия 94 мөл. солк. улааппыт;
* Хатас орто оскуолатыгар эбии дьиэни атыылаһарга анаммыт субсидия 201 мөл. солк. улааппыт;
– 2023 сыл тохсунньу 1 күнүнээҕи туругунан олохтоох бүддьүөккэ хаалбыт харчы суотугар бүддьүөт иэнин 213 мөл. солкуобайынан улаатыннарары чопчулуур сорук турар, ол иһигэр:
* 28 мөл. солк. – оҕо саадтарыгар хапытаалынай өрөмүөнү ыытырга уонна надзордуур уорганнар ыйыыларынан баһаартан сэрэхтээх буолууну хааччыйарга, үөрэх кыһаларыгар КПП тэрийэргэ;
* 11 мөл. солк. – анал байыаннай дьайыы кыттыылаахтарын оҕолорун сынньалаҥын ороскуотун 100% уйунарга;
* 93 мөл. солк. – чэпчэтиинэн туһанар категориялар 5-11 кылааска үөрэнэр оҕолор оскуолаҕа босхо аһыылларыгар уонна оскуола иннинээҕи саастаах оҕолор тэрилтэлэрин аһылыгынан хааччыйыыга;
* 80 мөл. солк. – муниципальнай үөрэх кыһаларын баайга-дуолга нолуоктарыгар уонна хомунаалынай төлөбүрдэригэр.
«Хомунаалынай инфраструктура тиһигин биир кэлимник сайыннарыы», «Куорат уокуругар аныгы куорат эйгэтин тэрийии», «Куорат нэһилиэнньэтин олорор дьиэнэн хааччыйыы», «Куорат нэһилиэнньэтигэр социальнай өйөбүлү уонна дьарыктаах буолууну хааччыйыы» муниципальнай бырагыраамалар ороскуоттарын улаатыннарар былаан баар. 
2024 сылга дохуот кээмэйэ 23 885 мөл. солк. тэҥнэһиэҕэ, ол иһигэр нолуоктан уонна нолуогу таһынан киирэр үп иэнэ уларыйыыта суох хаалар – 10 885 мөл. солк.
Оттон ороскуот кээмэйэ бүддьүөттэр икки ардыларынааҕы 30 мөл. солк. иэннээх трансфертар суоттарыгар 23 885 мөл. солк. тэҥнэһэн, 2024 сыл бүддьүөтэ диписииитэ суох буолара былааннанар.
2025 сылга ороскуот чааһыгар уларыйыыта суох 24 898 мөл. солк. хаалар.