12-с №-дээх оскуола биир симиэнэнэн үөрэнэр буолуоҕа

2023 сыл тохсунньу 21 күнүттэн Пригороднай сэлиэнньэтигэр 12 №-дээх оскуола саҥа салҕааһын тутуута үлэҕэ киирбитэ.

“Билиҥҥи туругунан оҕолор бары саҥа дьиэбитигэр үөрэнэ сылдьаллар. Салҕааһын тутуу 325 миэстэлээх, онон икки симиэнэнэн үөрэнэбит. Оскуола сүрүн дьиэтэ хапытаалынай өрөмүөнэ бүттэҕинэ, биир симиэнэҕэ көһөр кыахтаныахпыт”, – диэн кэпсээтэ дириэктэри үөрэх чааһыгар солбуйааччы Любовь Винокурова.  

Оскуола сүрүн дьиэтэ 2006 сыллаахха тутуллубута, 120 үөрэнэр миэстэлээх. Быйыл онно хапытаалынай өрөмүөн ыытыллыаҕа. Ол курдук, түннүктэрин, инженернэй ситимнэрин уларытыахтара, видеонан кэтээн көрүүнү киллэриэхтэрэ, о.д.а. үгүс үлэ күүтэр.

“Өрөмүөн кэнниттэн алын сүһүөх кылаастарбыт – туспа спорт саалалаах сүрүн дьиэҕэ, оттон 5-11 кылаастар саҥа салҕааһыҥҥа үөрэнэр буолуохтара”, – диэтэ дириэктэри солбуйааччы.

Билиҥҥи туругунан 12-с №-дээх оскуолаҕа 685 оҕо үөрэнэр, оскуола кэлэктиибэ 81 үлэһиттээх, онтон 66-та – учуутал. Уопсайа 5 тыһыынча кв. миэтэрэ иэннээх саҥа үс этээстээх дьиэ 27 толору хааччыллыылаах кэбиниэттээх,  киэҥ-куоҥ көрүдүөрдэрдээх, улахан түннүктэрдээх сынньанар сирдэрдээх, библиотекалаах, остолобуойдаах, медицинскэй кэбиниэттээх.  Ону сэргэ, учууталлар хосторо, үөрэнэр мастарыскыайдар бааллар.

Иккис этээскэ 300 миэстэлээх аактабай саалалаах. Душтаах, таҥас уларыттар хостоох спорт саала баар. Үһүс этээскэ – музыка уонна хореография саалалара. Кэбиниэттэр бары үөрэх уонна лабораторнай тээбириннэринэн хааччыллан тураллар. Салҕааһын тутууттан оскуола сүрүн дьиэтигэр, таһырдьа тахса сатаабакка, иһирдьэнэн курдары сылдьыахха сөп.

Маны таһынан, саҥа тутуу лифтээх, пандустаах, подъемниктаах, доруобуйаларыгар хааччахтаах дьон сылдьарыгар табыгастаах эйгэ тэриллибит. 
Сынньалаҥ муннуктарыгар биир кэрэхсэбиллээх көстүүнэн түннүктэрин сэҥийэлэрэ ыскамыайка быһыылаах бырайыактаммыттара буолар. Оҕолор олорор сир көрдүү ыраах сүүрбэттэр. Үрдүкү кылаас кыргыттарыгар туспа туалет баар. 

2014 сылтан оскуолаҕа физиканы, математиканы дириҥэтэн үөрэтэр бырагыраама олоххо киллэриллэр. 2021 сыллаахха гуманитарнай, естественнонаучнай, политехническай хайысхалаах бэһис кылаастар арыллыбыттара. 2020 сыллаахха оскуола Саха Өрөспүүбүлүкэтигэр “Үөрэхтээһин” национальнай бырайыак чэрчитинэн “Цифровой үөрэхтээһин эйгэтэ” федеральнай бырайыакка кыттыспыта. Онтон 2021 сыллаахха  “Точка роста” киин аһыллыбыта.

Өрөспүүбүлүкэҕэ киэҥник биллэр математика учуутала Александр Константинович Чиряев оҕолорго төгүрүк сыл үлэлиир үөрэх лааҕырын тэрийэр идиэйэни иитиэхтии сылдьар. 
“Биһиги биир симиэнэнэн үөрэххэ көһөр санаалаахпыт, ону таһынан олорор дьиэлээх-уоттаах (интэринээттээх – Эрэд.), сылы эргиччи үлэлиир тэрилтэлэниэхпитин баҕарабыт. Оччоҕуна оҕолор дьарыктаналларыгар табыгастаах буолуо этэ. Ити хайысхаҕа уопуттаахпыт, холобур, оскуолабытыгар сайыҥҥы лааҕыры үлэлэтэбит”, – диэн кэпсээтэ математика учуутала Александр Чиряев.

Аныгыскы үөрэх дьылыттан Пригороднай оскуолатыгар эбии үөрэхтээһиҥҥэ сонун хайысха – веб-дизайн киириэҕэ. Бу идэҕэ оҕолор 10-с кылаастан саҕалаан, икки сыл үөрэниэхтэрэ. Ол курдук, выпускниктарга аттестаты тэҥэ веб-дизайнер кууруһун ааспыттарын туоһулуур сибидиэтэлистибэни туттарар буолуохтара. Ону таһынан, баҕалаах үөрэнээччилэр медбыраат идэтигэр уһуйуллуохтара, маныаха туһааннаах үлэ ыытыллар. 
Билигин үрдүкү кылаас үөрэнээччилэрэ спортивнай ориентированиеҕа үөрэ-көтө дьарыктаналлар, куорат күрэхтэһиилэригэр номнуо кэккэ ситиһиилээхтэр. Оскуола салалтата хореографияҕа анал туспа саалалааҕынан киэн туттар. Бэлиэтээн эттэххэ, маннык саала ханнык да куорат оскуолатыгар суох.

Киэҥ-куоҥ оскуолаҕа олох күөстүү оргуйар: аныгылыы тупсаҕай кэбиниэттэргэ уруоктар ыытыллаллар.  Сынньалаҥ кэмигэр көрүдүөргэ оҕо толору. Кинилэр “Саҥа оскуолаҕытыгар тугу ордук сөбүлүүгүт?” диэн ыйытыыга биир киһи курдук эйэ дэмнээхтик: “Остолобуой!” – диэн хоруйдууллар. 

Санатан эттэххэ, Пригороднай сэлиэнньэтигэр 12-с №-дээх оскуола саҥа салҕааһынын тутуу 2021 сыл ахсынньы 10 күнүгэр саҕаламмыта. Оскуолаҕа эбии тутуу 2021-2024 сылларга үөрэхтээһин тэрилтэлэригэр эбии миэстэ таһаарар сыаллаах, ВЭБ РФ сайдыы судаарыстыбаннай корпорацията кыттыылаах   бырайыак бастакы түһүмэҕин чэрчитинэн олоххо киирбитэ. Тутааччынан “Арктик Капитал” ХЭТ буолбута.