11 уулуссаҕа өрөмүөн бара турар

«Главстрой» МХТ чахчытынан, ыам ыйын 29 күнүнээҕи туругунан, «Хаачыстыбалаах уонна куттала суох суоллар» федеральнай бырайыагынан киин куорат 11 уулуссатыгар өрөмүөн үлэтэ номнуо саҕаланна. 
Ленин проспега
Ленин проспегын Хабаров уулуссатыттан Краснояров уулуссатыгар диэри кэрчигэр канализация уонна гаас ситимнэрин кистээһин ыытыллар, Дзержинскэй уулуссатыттан Хабаров уулуссатыгар диэри сибээс уонна уулусса уотун ситимнэрин тардаллар. Эбийиэк устатын тухары бордюр, сатыы дьон сылдьар сирэ оҥоһуллар. Бэдэрээтчит –  «Дорстрой» ХЭТ.
Поярков уулуссата
Поярков уулуссатын Дзержинскэй уулуссатыттан Октябрьскай уулуссатыгар диэри кэрчигэр эргэ бордюрдары, тротуардары тууруу, аспаал үрүт араҥатын хастааһын, ону сэргэ Дзержинскэй уулуссатын өттүттэн саҥа аспаалы ууруу саҕаламмыт. Бэдэрээтчит –  «Сахатрасстрой» ХЭТ.
Бабушкин уулуссата
Бабушкин уулуссатын Сэбиэскэй Аармыйа 50 сыла уулуссаттан Очиченко уулуссатыгар диэри кэрчигин хапытаалынай өрөмүөнүгэр Очиченкоттан Кржижановскайга диэри уу сүүрэр турбаларын ууруу түмүктэммит. Эбийиэк сэттэ учаастагар уот уонна ититии ситимнэрин таһаараллар. Бэдэрээтчит – «Дороги Саха» САУо.
Винокуров уулуссата
Винокуров уулуссатын хапытаалынай өрөмүөнүнэн Ильменскэй уулуссаттан Чайковскай уулуссатыгар диэри уу сүүрэр лотоктарын уурар сир оҥоһуллар. Бэс ыйын бүтүүтэ улахан кыамталах тиэхиньикэ сырыытын хаарчахтыыр дьаһаллар ылыллаллара күүтүллэр. Бэдэрээтчит – «Сахатрасстрой» ХЭТ.
Бүлүүлүүр суол
Бүлүү суолун Лермонтов уулуссатыттан Объездной шоссеҕа диэри (1-кы пусковой комплекс) хапытаалынай өрөмүөнүгэр гаас ситимнэрэ саҥардыллар. Онон бэс ыйын 9 күнүттэн 18 чыыһылатыгар диэри Лермонтов уулуссатын учаастага сабыллар. Бэдэрээттээх тэрилтэ – «Сахатрасстрой» ХЭТ.
Челюскин уулуссата
Челюскин уулуссатын Сэбиэскэй Аармыйа 50 сыла уулуссаттан Беринг уулуссатыгар диэри кэрчигин хапытаалынай өрөмүөнүгэр тымныы регенерация ньыматынан суол таҥаһа ууруллар. Суол бордюра, уу сүүрэр ханаабата туруоруллар. Бэдэрээтчит – «РИК АВТОДОР» АУО.
Кузьмин уулуссата
Кузьмин уулуссатын хапытаалынай өрөмүөнүнэн «РИК АВТОДОР» АУо дьарыктанар.
«Севернай» кыбаартал
Севернай кыбаартал суолларын өрөмүөнүн 1-кы уочарата саҕаланна. Бэдэрээттээх тэрилтэ – «Альянс 2005» ХЭТ. 
Кымньыылаах уулуссата
Сыырдаах бөһүөлэгин Кымньыылаах уулуссатын өрөмүөнүн «РИК АВТОДОР» АУо оҥорор.
Можайскай уулуссата
Можайскай уулуссатын Пилоттар уулуссаларыттан Строд уулуссатыгар диэри кэрчигин уларытан тутуу бара турар. Бүгүҥҥү күҥҥэ сибээс ситимнэрин таһааран, балаһа ахсаанын түөркэ диэри кэҥэтии, ону сэргэ өрөмүөн кэмигэр эргийэн барар суолу оҥоруу ыытыллар. Бэдэрээтчит – «Дороги Саха» САУо.
Островскай уулуссата
Ыам ыйын 29 күнүттэн Островскай уулуссатын хапытаалынай өрөмүөнэ саҕаланна. Бэс ыйын 10 күнүттэн Островскай уулуссатынан сырыы сабыллар. Бэдэрээтчит – «Сэттэ» ДРСУ ХЭТ.