1 820 000 солк. иэннээх федеральнай граны Дьокуускайдааҕы В.П. Ларионов аатынан Физико-тэхиньиичэскэй лицей ылла

Бүтүн Арассыыйатааҕы «Движение Первых» Граннар күрэхтэрин иккис сезона түмүктэннэ.

Саха сириттэн кыттыбыт 100-тэн тахса тэрилтэттэн биэһэ кыайыылаах аатын ылбыт. Ол иһигэр Дьокуускай куораттааҕы В.П. Ларионов аатынан Физико-тэхиньиичэскэй лицей «Эко+» бырайыагынан 7-с миэстэҕэ тиксэн, 1 820 000 солк. суумалаах  Грант хаһаайына буолары ситиспит.

Дьокуускай куораттааҕы Култуура уонна сынньалаҥ пааркатыгар экологическай ыллыгы тэрийиигэ туһуланар «Эко+» бырайыак аны күһүн алтынньы ыйыгар диэри олоххо киириэхтээх. Оттон бырайыак партнердарынан Култуура уонна сынньалаҥ паарката, «Дьокуускай куорат уопсастыбаннай туоналарын салайар киин» муниципальнай тэрилтэ, СӨ экологияҕа, айылҕаны туһаныыга уонна ойуур хаһаайыстыбатыгар министиэристибэтэ, СӨ «Юные якутяне» ресурснай киинэ, Арктикатааҕы судаарыстыбаннай агротехнологическай университет уонна РНА СС Криолитозона биологическай кыһалҕаларыгар института буолаллар.