«Звезднай» дьоҕус оройуон катогун бастакы сыбаайата түстэ

«Демография» нацбырайыак иитинэн «Звезднай» дьоҕус оройуоҥҥа 2024 сылга диэри үлэҕэ киириэхтээх искусственнай муустаах каток бастакы сыбаайата түстэ. 
Ол аата баара-суоҕа балтараа сылынан манна 5 тыһ. тахса кв/м иэннээх икки этээстээх сабыылаах каток дьэндэйэн тахсан, Автодорожнай уокурук, «Птицефабрика» түөлбэ, ДСК, Эргэ Покровскайдыыр тракт элбэх ахсааннаах олохтоохторо дьиэлэриттэн чугастыы спордунан дьарыктанар, доруобуйаларын чэбдигирдэр буолуохтара. Хаҥкылыыр, хоккей, керлинг курдук сонун көрүҥнэринэн дьарыктанар саалалар, сынньанар хостор, административнай куорпус, быраас кабинета, тренажернай саала -- барыта 2027 сылга 11 тыһыынчаҕа тиийэ улаатар нэһилиэнньэлээх «Звезднай» олохтоохторун туһатыгар. 
Киин куорат историятыгар үһүс улахан катогу тутууну саҕалыыр үөрүүлээх түгэн Ил Дархан Айсен Николаев, куорат баһылыга Евгений Григорьев, дьокутааттар, уопсастыбаннас уонна, биллэн турар, «Полярные волки-2010» хоккей хамаандата кыттыылаах буолан ааста.