Дьокуускайга балаҕан ыйыгар Кадеттар оскуолаларын саҥа дьиэтэ үлэҕэ киириэҕэ
![Дьокуускайга балаҕан ыйыгар Кадеттар оскуолаларын саҥа дьиэтэ үлэҕэ киириэҕэ](https://kiinkuorat.ru/wp-content/uploads/2024/07/DLhXKE2QNF.jpg)
Дьокуускай Мархатыгар тутуллар Кадеттар оскуола-интэринээттэрин саҥа дьиэтэ 2022 сылтан «Үөрэхтээһин» национальнай бырайыагынан тутуллар, үбүлээһин кээмэйэ – 600 мөл. солк.
«От ыйын бүтүүтэ үөрэнэр куорпуһу үлэҕэ киллэрэн, балаҕан ыйыттан үөрэх саҕаланарын хааччыйыахтаахпыт. Сыл бүтүүтэ интэринээт дьиэтэ үлэҕэ киириэҕэ. Манна региональнай бырагырааманан 200 мөл. солк. курдук көрүлүннэ. Эһиилгиттэн эбийиэк үлэҕэ толору киирэн, 200 кадет үөрэнэр кыахтаныаҕа. Биһиэнин курдук аһаҕас халлаан анныгар эт-хаан өттүнэн сайдарга олус наадалаах балаһааккалардаах уонна интэринээттээх эбийиэк Уһук Илин үрдүнэн суох», – диэн оскуола дириэктэрин солбуйааччы, «Авангард» байыаннай-патриотическай иитии киинин үөрэтэр-методическай салаатын салайааччыта Николай Баланов санаатын үллэстэр.
Тутуу генеральнай бэдэрээтчитэ «ТСК +» ХЭУо. Бүгүҥҥү күҥҥэ эбийиэккэ 45 киһи үлэлиир.
Үөрэнэр куорпус 200 миэстэлээх. Биэс кабинет кылааһынан үөрэнэргэ ананар, химия, биология, физика лабораториялара бааллар, икки кабинет информатика уруоктарыгар анаммыт, манна 10-нуу компьютер туруоҕа, маны сэргэ икки лингафоннай кабинет, ырыа уруогун, ИЗО, черчение кабинеттара, маһынан, тимиринэн уһанарга үөрэтэр мастарыскыайдар, массыына ыытарга уонна байыаннай дьыалаҕа үөрэтэр кылаастар бааллар.
Үөрэнэр куорпуска итини таһынан 120 миэстэлээх ааҕар саалалаах библиотека, спорт саалата, 92 миэстэлээх остолобуой, гардероб, административнай уонна тэхиньиичэскэй хостор бааллар. Иккис уонна үһүс этээстэргэ торжественнай линейкалары ыытар холлар көрүллэллэр.
Интэринээт 125 миэстэлээх. Түөртүү-биэстии буолан олорор хостор, душ, санузел, дьуһуурунай баспытаатал, рекреация хосторо, интэриниэттээх уруок ааҕар хос бааллар.
Бастакы этээһигэр куруһуоктары ыытар, сынньанар хостор, медпуун, иитиллээччилэр малларын уурар хостор о.д.а бааллар. Кадеттар таҥас суунар, өтүүктэнэр хоһунан туһанар кыахтаахтар.
Оттон Уһук Илиҥҥэ суох аһаҕас халлаан анныгар дьарыктанар сиргэ байыаннай сулууспа төрүттэригэр үөрэтэр мэһэйдээх балаһа, сүүрэр сир, футбол, баскетбол, волейбол, хамсаныылаах оонньуулар балаһааккалара бааллар.
Николай Баланов иһитиннэрбитинэн, сүрүн болҕомто байыаннай-спортивнай бэлэмнэниигэ ууруллубут. Ол эбэтэр кадеттар уруоктарын кэнниттэн спордунан дьарыктаныахтара, ытарга үөрэниэхтэрэ, противогаһынан туһанары, БПЛАны ыытары баһылыахтара. Оттон сайыҥҥы өттүгэр интэринээт баазатыгар үөрэнэр-полевай сбордар ыытыллыахтара.
Оскуола-интэринээт территориятыгар сквер мастарын, ыскамыайкаларын урукку үөрэнээччилэр бэйэлэрин күүстэринэн оҥоруохтара, олордуохтара.
Сонуннар
Ордук ааҕаллар
![Түөһэйии элбээн иһэрэ дьиксиннэрэр...](/thumbnails/600/300/wp-content/uploads/2024/08/NNDIAGM5TA.jpg)
![Герман Отов: «Пригороднай аныгылыы улахан бөһүөлэк буолар чинчилээх...»](/thumbnails/600/300/wp-content/uploads/2024/09/inhECNdY5z.jpg)
![Баһылык Строительнай уокурук олохтоохторун кытта көрүстэ](/thumbnails/600/300/wp-content/uploads/2024/08/qRWAY5fveB.jpg)
![«Якутск вдохновляет» күрэххэ кыттыҥ!](/thumbnails/600/300/wp-content/uploads/2024/08/zc1WJpfgUt.jpg)