Ил Дархан Айсен Николаев «Звезднай» түөлбэ суолун болдьоҕор тутарга соруйда

«Звезднай» түөлбэ суолун бастакы түһүмэҕин Ил Дархан Айсен Николаев болдьоҕор тутарга соруйда. Ол туһунан от ыйын 17 күнүгэр буолан ааспыт өрөспүүбүлүкэҕэ тутуллар эбийиэктэри хонтуруоллуур оперативнай ыстаап мунньаҕар этилиннэ. 
Ил Дархан чуолаан «Звезднайга» уопсастыбаннай тырааныспар сырыытын кэмигэр арыйар сыалтан инженернэй ситимнэри тардар ресурсанан хааччыйар тэрилтэлэри кытта тэҥҥэ үлэлиир наадатын ыйда. Ол курдук, суол тутуутун инженернэй ситимнэри тардыыны кытта урут-хойут оҥоруу эбийиэги болдьоҕор үлэҕэ киллэриини атахтыыр кутталлааҕын эттэ. 
«Болдьоҕу куоттарыы, көһөрүү табыллыбат. Бастатан туран, нэһилиэнньэни саныахха наада. Куорат Олохтоох дьаһалтата ресурсанан хааччыйар тэрилтэлэри кытта бары боппуруоһу быһаарыан наада»,– диэтэ Айсен Ниолаев, диэн иһитиннэрэр Ил Дархан уонна Бырабыыталыстыба пресс-сулууспатын информациятынан Олохтоох дьаһалта пресс-сулууспата.