«Звезднай» бастакы ыалларын көрсөргө бэлэм

Ол туһунан «Өрөспүүбүлүкэтээҕи ипотека агентствота» АУо генеральнай дириэктэрин бастакы солбуйааччы Лия Шайнурова кулун тутар 22 күнүгэр СТВ араадьыйа быһа эпииригэр иһитиннэрдэ.

Сэттэ бастакы дьиэ малааһына чугаһаабыт

Лия Шайнурова иһитиннэрбитинэн, бүгүҥҥү күҥҥэ «Звезднай» дьоҕус оройуон А секторыгар 7 дьиэ тутуллан бүппүт, онон бастакы ыаллар муус устар ыйтан саҕалаан дьиэлэригэр киирэллэр. 
Бу күннэргэ үлэ С секторга саҕаламмыт, манна 10 дьиэ тутуллуохтаах. Дьиэ биир кв/м сыаната иэниттэн көрөн 105 тыһ. солк. 144,5 тыһ. солк. диэри халбаҥныыр. 

Хас этээстээх дьиэлэрий?

«Звезднай» дьиэлэрэ олус үрдүгэ суохтар, муҥутаан аҕыс этээстээхтэр, ол эрээри үрдүгүттэн тутулуга суох хас биирдии дьиэҕэ иккилии лииптээх буолар – пассажирскай уонна таһаҕас таһаарар.
Маны сэргэ дьиэлэргэ консьерж олорор, кэлээскэ туруорар миэстэлэр баар буолаллар.

Социальнай эбийиэктэр

Социальнай эбийиэктэртэн икки оскуола, икки оҕо саада, поликлиника уонна сылы эргиччи үлэлиир хоккейдыыр корт (А секторга) баар буолуохтара. Быйыл номнуо бастакы оскуола, оҕо саада уонна поликлиника тутуута саҕаланаллар. 

Куттала суох оройуон*

Кыбаарталы кыйа итиэннэ дьиэлэр тастарыгар уонна подъездтар истэригэр видеонан кэтээн көрүү олохтонор. 

Массыына турар сирэ

А секторга «массыыната суох тиэргэн» диэн сонун концепция олоххо киирэрэ сабаҕаланар, ол эбэтэр массыына туруорар сир үгэс курдук дьиэ иннигэр, тэлгэһэҕэ буолбакка, дьиэ кэннигэр тэриллэр. Оттон В уонна С сектордарга комбинированнай стоянкалар олохтоноллор. Маны сэргэ сылаас гараастар көрүллэллэр. Манна даҕатан эттэххэ, массыыналарга анаан Эргэ Покровскай трагыгар тахсар суол оҥоһуллара сабаҕаланар.

Сүрүн тырааныспар – бэлисипиэт

«Звезднай» бырайыагын биир кэрэхсэбиллээҕэ – бары сектордары холбуур бэлисипиэт суоллара. Ол эбэтэр дьоҕус оройуон иһинэн холкутук бэлисипиэтинэн сылдьыахха сөп. 

Көҕөрдүү үлэтэ 

Дьоҕус оройуону көҕөрдүүнэн дьарыктанар тэрилтэ номнуо быһаарыллыбыт. Бу сааскыттан манна мас, сэппэрээк олордуутун саҕалыыр былааннаахтар. Олордуу мастарга уу кутар анал систиэмэ оҥоһуллар. Кэнэҕэһин үүннэриллибит мастары, сэппэрээктэри, ону сэргэ дьиэлэри «РИА-Комфорт» диэн Салайар хампаанньа көрүөҕэ-истиэҕэ.

Оптуобус 

«Звезднайы» куораты кытта холбуурга эбии оптуобус тохтобуллара тэриллиэхтэрэ. Тохтобуллар кыбаартал тас өттүгэр А сектор чугаһыгар баар буолаллара сабаҕаланар.