«Жилкомсервис» тэрилтэҕэ Саха сирин тымныытын уйар хомунаалынай тиэхиньикэ кэллэ

Бу күннэргэ «Жилкомсервис» муниципальнай тэрилтэҕэ түөрт устуука саҥа ассенизаторскай тиэхиньикэ кэллэ. «Шахман» кытай мааркатын базатыгар таҥыллыбыт Саха сирин тымныытын уйар ураты тиэхиньикэни Дьокуускай куорат уопсайа тоҕус ахсаанынан сакаастаан турар.

Ол курдук, саҥа ассенизаторскай массыыналар Дьокуускай куорат сакааһынан «Шахман» диэн кытай мааркатын базатыгар таҥыллыбыттар уонна цистернэлэрэ Челябинскай куорат собуотугар олордуллубуттар.

Саҥа тиэхиньикэ сүрүн уратытынан цистернэни сылытар систиэмэтэ уонна түргэнник сүөкүүр кыраана буолаллар. «Урут «Камаз» атыылаһан баран, цистернэни сылытар тэрили салгыы бэйэбит оҥорон туһаммыт, онуоха элбэх бириэмэни бараабыт  буоллахпытына, билигин бэйэбит баҕабытынан оҥоһуллубут бэлэм конструкцияны туттубут. Биллэн турар, уларытыылар массыына пааспарыгар киллэриллэн тураллар. Онон биһиэхэ майгынныыр айылҕалаах регионнар номнуо көҥүл көрдөөн эрэллэр»,– диэн  быһаарар «Жилкомсервис» МУТ салайааччыта Юрий Спиридонов.

Дьокуускай куоракка убаҕас бөҕү тиэйэр бастакы ассенизаторскай массыыналар 2023 сыллаахха атыылаһыллан, ахсынньы ыйтан үлэлииллэр. Мантан саас уулусса-суол ситимигэр ууну оборторууга тахсыахтара.

Куорат баһылыга Евгений Григорьев бэлиэтээбитинэн, 2030 сылга диэри Дьокуускай куоракка Владимир Путин сорудаҕынан ардах уутун сүүрдэр 1985 км усталаах саҥа халдьалар тутуллуохтара. Онуоха диэри куораты ардах-хаар уутуттан бу саҥа массыыналар ыраастыахтара.

Оттон саҥа тиэхиньикэ уруулугар олорбут суоппардар массыыналар үрдүк кылаастаахтарын, кыахтаахтарын, эбиитин кэннинээҕи сиэркилэлээхтэрин биһирээбиттэрин бэлиэтииллэр.

Евгений Григорьев маны сэргэ быйыл «Жилкомсервис» тэрилтэҕэ тиэхиньикэтин барытын гаас уматыкка көһөрөргө сорудахтаата. 2021-2023 сс. ыытыллыбыт Тупсарыы сылларыгар Дьокуускай куоракка уопсайа 87 араас хомунаалынай тиэхиньикэ ылыллан, «Якутдорстрой» АУО уонна «Жилкомсервис» МУТ туһаларыгар бэриллэн турар, диэн иһитиннэрэр Олохтоох дьаһалта пресс-сулууспата.