07.09.2022 | 21:39

Забастовка

Биһиги кэммит кэрэхсэбиллээх суруйааччыта Борис ПАВЛОВ күлүм кэпсээннэрин таһаарабыт.
Забастовка
Ааптар: Борис ПАВЛОВ

Мэхээлэ үлэтиттэн кэлбитэ дьоно телевизор көрө олороллоро. Депутакка кандидаттары туруоруу хампаанньата бара турара. Күөх экрантан хаалтыстаах, килэгир ачыкылаах киһи тугу эрэ кэпсээн күлүмнэтэр. Илиитэ биир кэм эп-элэҥнэс.

Чэйдии олорон ол туһунан кэпсэтии буолла.
- Сиидэрэп маладьыас, - диир кэргэнэ, тэриэлкэҕэ хойуу миини кута-кута. – Дьахталларга  оҕолоннохторуна харчыларын эбэбин диэтэ.
- Дьөгүөрэп ордук, - диир алтыска үөрэнэр уола Куонаанчык. – Оҕолорго көҥүлү биэриэххэ наада диэтэ. Куолаһы киниэхэ биэрэр сөп.
- Пахай, - диэтэ тохсуска үөрэнэр кыыһа Дуунньа. – Дьөгүөрэп кулгааҕа даллаҕара бэрт. Оттон Сиидэрэп мунна токур. Ыстапаанапка куоластыахха наада. Кини санна да кэтит, уҥуоҕа да уһун…


Мэхээлэ иккис күнүгэр үлэтиттэн кэлбитэ дьоно эмиэ телевизор иннигэр олороллор. Күөс оргуйбут, ол эрээри дьоно аҕаларын да аһатар, бэйэлэрэ да аһыыр быһыылара  көстүбэт. Мэхээлэ кэтэстэ. Аччыктаата. Ыҥыран көрбүтүгэр: «Тохтоо, тулуй, Дьөгүөрэп программатын ситэри истиэххэ», -  диэтилэр. Киэһэ хойут чэйдээтилэр. Эмиэ кандидаттар тустарынан кэпсэттилэр. Ыстапанап программата Сиидэрэптээҕэр туох ордуктааҕын ырытыстылар. Онтон Куонааскы эмискэ эргиллэ түһэн, уҥуох тиниктээн хадьырыйа олорор  Мэхээлэттэн ыйытта:
- Аҕаа, эн куоласкын кимиэхэ биэрэҕин?
- Ким билэр доҕор, оттон… оттон тырахтарыыстарга ким тугу биэриэх буолар?
- Ыларын эрэ билэр. Киһи бөҕө, - диэтэ кэргэнэ.
- Маннык дьоннордоох буолан баччааҥҥа диэри сайдыбаппыт, - диэтэ Куонааскы.

Онтон Дуунньа күлэн тоҕо баран иһэн, айаҕын ытыһынан хам туттан, хоһугар куймурус гынан хаалла.
Мэхээлэ үһүс күнүгэр үлэтиттэн кэлбитэ дьонноро эмиэ телевизор иннигэр олороллор. Мэхээлэ кэтэстэ. Аччыктаата. Онтон:
- Бу туох үлүгэрэй? Тэлэбиисэри сиэри гынныгыт дуо? – диэн баран тиийэн розеткаттан арааран кэбистэ. Онуоха дьонноро кыыһыран турдулар.
- Ньүдьү балай! – диэтэ кэргэнэ.
- Билигин демократия үйэтэ. Күүһүнэн өттөйөр сыыһа, - диэтэ Куонааскы. – Забастовката биллэриэххэ. Мантан ыла бэйэтэ астанан аһаатын.
- Эн культ-лиичинэскин, - диэтэ Дуунньа уонна сөмүйэтинэн супту аста. – Забастовка биллэрэр саамай сөп. Кэһэйдин.


Төрдүс күнүгэр Мэхээлэ холуочук кэллэ. Дьоно телевизор иннигэр олороллор. Хаалтыстаах, тараҕай төбөлөөх киһи тугу эрэ дакаастаан этэн-тыынан көппөҥнөтөр. Мэхээлэ сыгынньахтаммакка эрэ хоско алтахтаан киирэн телевизоры тэбэн саайда. Солярка сыттаах хаатыҥка тараҕай киһи төбөтүн арыый ойоҕолуу саайылынна. Телевизор охтон «күр» гынна, алдьанар, үлтүрүйэр тыас барчаланна… Кэргэнэ «уой» диэтэ уонна оһох диэки харбыаласта. Куонааскы «мууһум» диэн баран таһырдьа ыстанна. Дуунньа куттаммыттыы хоһун диэки дьылыс гынан хаалла.
Бэһис күнүгэр Мэхээлэ үлэтиттэн кэлбитэ күөс быргыччы буһан тоһуйда. Тута остуол тула олорон аһаатылар. Ортолуу аһаан иһэн, кэргэнэ ыйытта:
- Мэхээлэ, ыаллар телевизор атыылыыллар эбит. Хайыыбыт?
- Суох, - диэтэ Мэхээлэ уонна ньирэй баһын саҕа сутуругун остуолга уурда, - Мин куул лиичинэспин эһиэхэ биллэрэн иһиэм.

Сонуннар

Ордук ааҕаллар

Үлэҕэ ыыппытым, состоруулаах кэллэ
Сынньалаңңа | 22.09.2022 | 18:00
Үлэҕэ ыыппытым, состоруулаах кэллэ
Биһиги ыал буолан олорбуппут 20-тэн тахса сыл буолла. Кэргэммин хас хамсаныытын, тыынарын, атаҕын тыаһын, оннооҕор ааны арыйан киирэриттэн настарыанньата уларыйбытын олох ончу курдаттыы билэбин. Ол курдук чугастыыбыт, ол курдук бэйэ-бэйэбитин билсэн, биир сыалай буолбуппут ыраатта. Оннооҕор биир түүлү түһээн турааччыбыт, киэһээҥҥи аһылыкка тугу астыахтаахпытын, тугу сиэхпитин баҕарарбытын тэҥинэн этэн кэбиһэн...
Үлэни, дьиэ кэргэни өрө-тутан – үйэ аҥаара бииргэ
Дьон | 22.09.2022 | 10:00
Үлэни, дьиэ кэргэни өрө-тутан – үйэ аҥаара бииргэ
Быйыл балаҕан ыйыгар Дьокуускайга Саха АССР 100 уонна киин куорат төрүттэммитэ 390 сылларыгар анаммыт «Трудовые династии города Якутска» кинигэ сүрэхтэммитэ. Кинигэни Саха сирин бэчээтин туйгуна Юрий Троев таһаарда, ааптар-хомуйааччы – Матрена Кондратьева.
Үтүө үөрүйэх уонна практикаҕа таба туһаныы
Сонуннар | 22.09.2022 | 11:22
Үтүө үөрүйэх уонна практикаҕа таба туһаныы
Дьокуускай куорат спортивнай үҥкүүгэ тренердэрэ анал үөрэхтээһини көхтөөхтүк ааһаллар уонна бэйэлэрин сатабылларын үрдэтэллэр. Балаҕан ыйыгар ыытыллыбыт үөрэх бу сылга номнуо иккиһин буолла. Тустаах тосхол 2021 сыллаахха бигэргэниэҕиттэн 5 маастар- кылаас ыытылынна.
Саныахха бу ааспыт сайыны
Сынньалаңңа | 23.09.2022 | 18:00
Саныахха бу ааспыт сайыны
Сайыммыт элэс гынан ааспытын өйдөөбөккө да хааллыбыт. Харах далыгар сылдьар дьоммут сынньалаҥнарын хайдах атаардылар? Ким тугу ситистэ, ханна сырытта? Ол туһунан биһиги “сулус” доҕотторбутуттан сурастыбыт.