Ытыктабыллаах куорат олохтоохторо!
Ытыктабыллаах куорат олохтоохторо!
Куорат салалтатын уонна тус бэйэм ааппыттан Саха Өрөспүүбүлүкэтин күнүнэн эҕэрдэлиибин!
1922 сыл муус устар 27 күнэ биһиэхэ сүдү историческэй суолталаах, ити күнтэн саҕалаан Саха сирин бары норуоттарын олоҕо сүҥкэнник уларыйбыта. Бу күн биһиги биллиилээх политическай деятеллэрбитин – Саха АССР төрүттэспит дьоммутун Платон Алексеевич Ойуунускайы, Максим Кирович Аммосовы, Исидор Никифорович Бараховы, Степан Максимович Аржаковы уонна кинилэр үөлээннээхтэрин санаан ааһабыт.
Аны биир сылынан Сахабыт сирин автономиятын 100 сылын бэлиэтиэхпит. Саха Автономнай Сэбиэскэй Социалистическай өрөспүүбүлүкэ (Саха АССР) тэриллиитэ өрөспүүбүлүкэбит сайдыытын сүрүн хайысхаларыгар олук уурбута. Биһиги норуоппутугар социальнай-экономическай сайдыыга туһааннаах механизмнары талар кыаҕы биэрбитэ, экономическай, духуобунай, култуурунай, политическай уонна судаарыстыбаннай эйгэлэргэ саҥа саҕахтары арыйбыта. Ити сүҥкэн суолталаах күнү көрсө Сахабыт сирин бүтүннүүтүгэр, ол иһигэр өрөспүүбүлүкэбит киин куоратыгар Дьокуускайга саҥа социальнай объектар, суоллар, олорор дьиэлэр тутуллуохтара.
Билигин өрөспүүбүлүкэбит Уһук Илиҥҥэ социальнай-экономическай сайдыы лидерэ. Биһиги биир дойдулаахтарбыт, ол иһигэр өрөспүүбүлүкэ киинин олохтоохторо дьаныардаахтык үлэлээннэр, Саха сирэ Арассыыйа судаарыстыбата экономическай сайдыыта үрдүүрүгэр уонна дойдубут бөҕөргүүрүгэр бэйэтин сүдү кылаатын киллэрэр.
Эһиэхэ чэгиэн доруобуйаны, дьолу, бэйэҕитигэр уонна чугас дьоҥҥутугар этэҥҥэ буолууну баҕарабын!
Дьокуускай куорат баһылыга Евгений ГРИГОРЬЕВ
Сонуннар
Ордук ааҕаллар
