«YktGeekFest» онус төгүлүн ыытылынна!

Атырдьах ыйын 11 күнүгэр “Туймаада” стадиоҥҥа “YktGeekFest” (“ГикФест”) аныгы култуура бэстибээлэ 10-с төгүлүн ыытылынна. Биир күн устата араас күрэстэр, фотозоналар, дьаарбаҥка уонна ыҥырыылаах ыалдьыттары кытта көрсүһүүлэр тэрилиннилэр. Бэстибээл ойуулугу, киинэни, анимены, көмпүүтэр оонньууларын сэҥээрээччилэри уо.д.а. аныгы култуураны уонна айар үлэни сэргээччилэри түмтэ.

Тэрийээччилэр бэлиэтээбиттэринэн, быйылгы бэстибээл урукку рекорду куоһарда. Уопсай косплей күрэҕигэр 1134 сайаапка киирбит, профессиональнай косплей күрэҕэр 42 киһи кытынна. Оттон ааптардар аллеяларыгар 87 худуоһунньук бэйэтин үлэтин көрдөрдө, Handmade дьаарбаҥкаҕа — 50 киһи.

Бэстибээл биир сүрүн күрэҕэ — косплей көстүүм куонкуруһа. Кыттааччылар сөбүлүүр ойуулуктарын, көмпүүтэр оонньууларын дьоруойун курдук таҥнан-симэнэн, сыанаҕа муусука доҕуһуоллаах дефиле көрдөрдүлэр. Косплей эйгэтигэр дьон кыра саастарыттан киирэллэр, ол курдук 5 саастаах Диана Яковлева “Алиса в стране чудес” киинэттэн Кыһыл Королева уобараһын үтүктүбүт. Кини көстүүмүн эдьиийэ Амина балтараа эрэ күн иһигэр тигэн биэрбит:

— “ГикФест” сыл аайы саамай кэтэһэр тэрээһиммит, быйыл эмиэ наһаа үчүгэйдик, үрдүк таһымнаахтык ааһан эрэриттэн үөрэбит эрэ. Быйыл иккиспитин кыттабыт, былырыын Хелло Китти буолбуппут, көстүүмүн эмиэ бэйэм тикпитим. Дианаҕа хас да уобарастан биири талларбыппыт, ону кини Королеваны былаачыйалаах, кыыска быдан барсар диэн талбыта. Балтараа күн иһигэр таҥаһа-симэҕэ барыта үчүгэй баҕайытык тахсан кэлбитэ, улахан уустуктары көрсүбэтэҕим. Уопсай косплей күрэҕэр кыттыыны ыллыбыт, ханнык эмит бириистээх миэстэҕэ тиксиэхпит этэ диэн эрэнэбит.

Косплей күрэҕэр бүтүн дьиэ кэргэнинэн кытталлара ордук кэрэхсэбиллээх көстүү буолла. Холобур, Рожиннар “Гравити Фолз” ойуулук дьоруойдарын курдук таҥнан кэлбиттэр. Аҕалара Дмитрий — Стэн, ийэлэрэ Мария — Билл Шифр, оттон уолаттара Айхал, Сандал Диппер уонна Тайрон буолбуттар. Кинилэри кытта кумааҕыттан кырыллыбыт Замятыш “сылдьар”.

— Биһиги оҕолорбут “Гравити Фолз” ойуулугу сөбүлүүллэр. Онон кинилэри өйөөн, дьиэ кэргэнинэн бары косплейдыы кэллибит. Көстүүмнэрбитин бэйэбит тикпиппит, ол эрээри саамай уустуга, соһуйуох иһин, оҕолор париктара этэ. Уолаттар иккиэн Диппер буолуохтарын баҕарбыттара, ол иһин биирдэстэрэ Диппер клона Тайрон буолла. Оттон мин хат буоламмын, Билл көстүүмүн кэттим. Биһиги “ГикФесткэ” үсүһүн кыттабыт. Аан бастакыбытын эмиэ бары күргүөмүнэн “Покемон” буолбуппут, ааспыт сылга бөлөҕүнэн косплейга бастакы миэстэ ылбыппыт. Бу сылга эмиэ күрэххэ кыттан, кыайыахпыт диэн эрэнэбит. Өссө аймахтарбытын кэтэһэбит, кинилэр эмиэ “Гравити Фолз” атын дьоруойдарын курдук таҥнан кэлиэхтээхтэр. Быйылгы “ГикФесткэ” косплейдаах киһи элбэх, онон быдан дьэрэкээнник, интэриэһинэйдик көстөр, — диэн Мария кэпсээтэ.

Бэстибээлгэ чопчу ханнык эрэ дьоруойдары косплейдааһын эрэ буолбакка, хомуур уобарастары да кэтиэххэ сөп. Ол курдук Егор Иванов тойоно суох хаалбыт ронин самурай курдук таҥнан кэлбит.

— Көстүүммүттэн хакама таҥаһы сакаастаан тиктэрбитим, оттон “соломо” плаһы булчуттар маҕаһыыннарыттан атыыласпытым. Сэлээппэни бэйэм оҥостубутум, ийэм эргэ сэлээппэтин кырыйан, соломо эбэн, дьоппуоннуу истииллээх буоларын курдук тикпитим. Өссө икки мас катаналаахпын, аан бастаан сувенирнай, тимир катаналары аҕалыахпын баҕарбытым, хомойуох иһин, тэрийээччилэр оҕолор эчэйиэхтэрэ диэн куттанан, боппуттара. “ГикФесткэ” иккиһин сылдьабын уонна быйыл бастакыбын косплейдыырга быһаарынным. Элбэх киһи миигин “үчүгэй көстүүмнээххин” диэн хайҕыыллар, хаартыскаҕа бииргэ түһэллэр. Тэрийиитэ уруккутун курдук үрдүк таһымнаах, үөрүү-көтүү үгүс. Аан дойдуга ол-бу араас куһаҕан буола турар кэмигэр маннык кэрэ түгэннэр бааллара олус үчүгэй. Мин санаабар, маннык тэрээһиннэри көтүппэккэ сылдьыахха наада.

Бэстибээл ыҥырыылаах ыалдьыттарынан “Metal Family” ютуб-ойуулук  айааччылара Алина Ковалева уонна Дмитрий Вдовенко, ону тэҥэ «Студийная банда» аниме-дубляж артыыстара Вероника Нефедова, Александр Скиданов уонна Георгий Кармрян буоллулар. Кинилэр бэйэлэрин бырайыактарын туһунан кэпсээтилэр, фанаттар ыйытыктарыгар хоруйдаатылар уонна автограф-сессияны ыыттылар.

Ааптар хаартыскаҕа түһэриилэрэ