«Өйдөбүнньүк чүмэчитэ» аахсыйаҕа 10 тыһыынчаттан тахса киһи кытынна

Ыам ыйын 8 күнүгэр Кыайыы болуоссатыгар буолан ааспыт «Өйдөбүнньүк чүмэчитэ» аахсыйаҕа 10 000 тахса киһи кыттыыны ылла.

«Илиибитигэр тутан турар чүмэчилэрбит Кыайыы туһугар олохторун толук уурбут мөлүйүөнүнэн саллаат, концлааҕыр сиэртибэтэ буолбут мөлүйүөнүнэн дьылҕа, тыылга кыайыыны уһансыбыттарга өйдөбүнньүк бэлиэтэ. Саха сириттэн Аҕа дойду  сэриитигэр 62 тыһыынча киһи аттаммыта уонна аҥаардара төннүбэтэҕэ. Тыылга хаалбыттар бэйэлэрэ хоргуйалларын аахсыбакка, Кыайыы туһугар бүтэһиктэрин кэрэйбэтэхтэрэ. Ким да умнуллубат, туох да умнуллубат»,– диэтэ Евгений Григорьев.

Бу күн уонунан тыһыынча чүмэчинэн Кыайыы болуоссатыгар «Помним» диэн тыл сурулунна, аахсыйаҕа кыттааччылар ортолоругар Бырабыыталыстыба чилиэннэрэ, Ил Түмэн, Куорат дууматын дьокутааттара, Олохтоох дьаһалта үлэһиттэрэ, тэрилтэлэр салайааччылара, Арассыыйа Дьоруойа Николай Соболев, куорат олохтоохторо, ыччаттар бааллар, диэн иһитиннэрэр Олохтоох дьаһалта пресс-сулууспата.