Ыччаты «Дьокуускайга 5 күн» квест-оонньууга ыҥыраллар

Дьокуускай куорат Уокуруктааҕы дьаһалтата көхтөөх, эдэр уонна дьулуурдаах дьону «Дьокуускайга 5 күн» умсугутуулаах квест-оонньууга кыттарга ыҥырар. Оонньуу балаҕан ыйын 10 күнүгэр 12.00 чаастан саҕаланар уонна балаҕан ыйын 15 күнүгэр 15.00 чааска түмүктэнэр. Ол туһунан Уокуруктааҕы дьаһалта пресс-сулууспата иһитиннэрдэ. 
Квест көхтөөх буолууга, төрөөбүт куораппыт историятын билиигэ, бэйэни сайыннарыыга, дьону кытта бииргэ алтыһа үөрэниигэ уонна куорат нэһилиэнньэтигэр патриотическай тыыны үөскэтиигэ туһуламмыт.  
Кыттыан баҕалаахтар http://ykt.en.cx сайтка регистрацияланаллар уонна биэс күн устата 12.00 чааска сорудахтары ылаллар.  Кыттааччылары регистрациялааһын  болдьоҕо суох, ол эбэтэр бырайыак ханнык баҕарар түһүмэҕэр кыттан саҕалыахха сөп. 
Квест кыттыылаахтара сорудахтары толордохторуна бааллары ылаллар, бааллара Encounter платформаҕа бэлиэтэнэллэр. Сүрүн болҕомто түргэнник элбэх сорудаҕы толорорго ууруллар. 
Күн аайы 19.00 чааска @minmol_ykt инстаграмын сирэйигэр саамай түргэнник сорудахтары толорбут кыайыылаахтар сыаналаах бириистэринэн наҕараадаланаллар. Квест-оонньуу кыайыылааҕа супербирииһи – Iphone 11 смартфону ылар.
Тэрээһини Дьокуускай куорат Уокуруктааҕы дьаһалтата СӨ ыччат дьыалаларыгар уонна социальнай коммуникацияларга Министиэристибэтин өйөбүлүнэн ыытар.