Ыччат Нам алдьархайыттан туора турбат

Ыам ыйын 25 күнүгэр волонтердар уонна ыччат тэрилтэлэрин бэрэстэбиитэллэрэ Нам улууһугар тахсан субуотунньук ыыттылар. Бу дьоһун хардыы СӨ Ыччат дьыалатыгар уонна социальнай коммуникацияларга министиэристибэтин уонна Саха сирин Ил Дархана Айсен Николаев сорудаҕынан ыытылынна. 

200-чэкэ эдэр киһи, ол иһигэр волонтердар, устудьуоннар этэрээттэрэ уонна актыбыыстар, ыарахан быһыыга-майгыга түмсүүлээхтэрин, биир сомоҕо буолалларын көрдөрдүлэр. Кинилэр уопсастыбаннай территориялары чөлүгэр түһэриигэ, ону тэҥэ Граф биэрэгэр, Маймаҕаҕа уонна Нам оройуонун Хатырык нэһилиэгин олохтоохторугар халаан содулун чөлүгэр түһэриигэ көмөлөстүлэр.
Айыллаан Винокуров салайааччылаах 60-тан тахса киһилээх волонтердар этэрээттэрэ Граф биэрэгэр үлэлээтэ. «Соҕотох олорор ыалга, ону тэҥэ дьиэлэрэ улаханнык эмсэҕэлээбиттэргэ аадырыстаах көмө оҥорорго ураты болҕомтобутун уурабыт. Биһиги олбуордары ыраастааһыҥҥа көмөлөһөбүт, холобур, кыргыттар дьиэлэр истэрин ыраастыырга көмөлөстүлэр, уоннааҕылар сэлиэнньэлэр киин уулуссаларын ыраастааһыҥҥа үлэлээтилэр»,– диэн салайааччы кэпсээтэ.

Маймаҕа сэлиэнньэтигэр 30 киһилээх «ZEMA» уопсастыбаннай тэрилтэ актыбыыстара үлэлээтилэр. Оҕолор бэйэлэрэ бэлиэтииллэринэн, уопсай кыһалҕаҕа аһыныгас сүрэхтээхтэрин көрдөрбүттэр. 
Онон субуотунньук кыттыылаахтара ыарахан күҥҥэ түмсүүлээхтэрин, бары биир киһи курдук толкуйдуулларын, биир санаалаахтарын биллэрдилэр. Ону сэргэ устудьуоннар тутар этэрээттэрин Саха сиринээҕи ыстаабын салайааччыта Айсен Соловьев бэс ыйын 10 күнүттэн Нам оройуонугар эмсэҕэлээбит сэлиэнньэлэргэ 50 байыас үлэлииргэ бэлэмин иһитиннэрдэ.