Ыччат лидерэ Арассыыйа бэрэсидьиэнин мэтээлин тутта

Саха Өрөспүүбүлүкэтин Ыччатын парламенын бэрэссэдээтэлэ Антон Васильев Арассыыйа бэрэсидьиэнэ Владимир Путин өйдөбүнньүк мэтээлинэн уонна «За бескорыстный вклад в организацию Общероссийской акции взаимопомощи #Мывместе» диэн грамотатынан наҕараадаланна. Грамотаны уонна мэтээли Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Ольга Балабкина туттарда. 
 «Коронавирус дьаҥын кэмигэр, 2020 сыл сайыныгар, доҕотторбун кытта санааны көтөҕөр контент оҥорорго быһаарыммыппыт. «Саха» НКИХ өйөбүлүнэн айар бөлөх тэринэн бастакы бырайыактарбытын толкуйдаабыппыт. Айар бөлөхпүтүн “AYAR” диэн ааттаабыппыт. Хас да бырайыактан талан хас бээтинсэ ахсын тахсар “Күөрчэх шоу” биэриини олохтообуппут, итини көхтөөх ыччаты түмэн оҥорорбут. Биэриигэ биллиилээх дьону эрэ буолбакка, көхтөөх ыччаты ыҥыраммыт уопсастыбаннай бырайыактарын, коронавирус дьаҥын кэминээҕи олохторун- дьаһахтарын туһунан кэпсэтиилэри устубуппут. Билиҥҥи ыччат чаҕылхай хартыыналары сөбүлүүр, ол иһин биэриилэрбитин оонньуу курдук гыммыппыт. Билигин икки бырайыакка үлэлэһэбит — «AYAR SHOW» уонна “Я-молодой” диэн. Онон үлэбит билигин даҕаны бүппэт, төттөрүтүн күөстүү оргуйар. Мэтээл уонна «МыВместе” грамота норуоттар икки ардыларынааҕы бириэмийэ призера буолбуппутунан кэллэ. Итинник бириискэ тиксиэхпит диэн санаабатахпыт. Соһуйдубут, үөрдүбүт», - диир Ыччат парламенын бэрэссэдээтэлэ Антон Васильев.