«Ыччат – Дьокуускай куорат сайдар энергията 2022» дьыалабыай оонньуу саҕаланна

Кулун тутар 21 күнүгэр киин куоракка X-с үбүлүөйдээх «Ыччат – Дьокуускай куорат сайдар энергията 2022» дьыалабыай оонньуу саҕаланна. Бу туһунан Дьокуускай куорат уопсастыбаннай сибээстэргэ уонна ыччат бэлиитикэтигэр Управлениета иһитиннэрдэ.
Кыттааччылар бастакы көрсүһүүлэригэр куорат баһылыга Евгений Григорьев эҕэрдэ тылы эттэ.
««МЭР» дьыалабыай оонньуу баар буолан куораппытыгар көхтөөх ыччат элбэх идиэйэлэрэ олоххо киирдэ. Быйыл даҕаны куорат олохтоохторугар наадалаах аныгы этиилэр уонна идиэйэлэр оҥоһуллуохтара диэн эрэнэбин» - диэн бэлиэтээтэ Евгений Николаевич.
Хамаандалар алта ый устата биэс араас түһүмэҕинэн күрэхтэһиэхтэрэ. Хас биирдии түһүмэх быйылгы үбүлүөйдээх дааталарга анаммыт:
1 түһүмэх – Саха Өрөспүүбүлүкэтигэр Ийэ Сыла;
2 түһүмэх – Саха АССР төрүттэммитэ 100 сыла;
3 түһүмэх – бастакы сокуон уорганын 200 сыла;  
4 түһүмэх – Арассыыйаҕа култуура нэһилиэстибэтин Сыла;
5 түһүмэх – Дьокуускай куорат төрүттэммитэ 390 сыла. 
Көрсүһүүгэ тэрийээччилэр кыттааччыларга дьыалабыай оонньуу сүрүн соруктарын уонна түһүмэхтэрин туһунан быһаардылар. Хамаандалар хапытааннара бэйэ-бэйэлэригэр эҕэрдэ тылы эттилэр уонна бары кыттааччыларга ситиһиини баҕардылар.
Манна даҕатан эттэххэ, «МЭР» дьыалабыай оонньуу кыайыылаахтара Олохтоох дьаһалта каадырын резервэтигэр киириэхтэрэ уонна сыаналаах бириистэринэн наҕараадаланыахтара.