ЫБММ управлениета баҕа өттүнэн баһаары умуруорааччылары наҕараадалаата
Биэдэмистибэ пресс-сулууспата иһитиннэрбитинэн, 2022 сыл саҕаланыаҕыттан баһаарынайдары сэргэ эбии 363 киһи баһаары умуруорууга үлэлэспит. Үөрүүлээх тэрээһин чэрчитинэн кинилэргэ Арассыыйа ЫБММ мэтээллэрин, бочуоттаах грамоталарын уонна махтал суруктарын туттардылар.
«За содружество во имя спасения» мэтээлинэн Хаҥалас улууһун Баҕа өттүнэн баһаары умуруорар хамаанда салайааччыта Михаил Михайлов наҕараадаланна. Баһаартан куттал суох буолуутун хааччыйыыга гражданскай көҕүлээһиннэрин иһин бочуоттаах грамоталарынан баһаары баҕа өттүнэн умуруорааччылар – Таатта, Хаҥалас, Алдан уонна Нерюнгри оройуоннарыттан Егор Марков, Иннокентий Рахлеев, Семен Тимофеев, Евгений Флусов уонна Григорий Деревцов, итиэннэ «Сатал» СОНТ баҕа өттүнэн баһаартан көмүскүүр «Харысхал» хамаанда волонтердара Афанасий Шишигин уонна Иван Дьячковскай наҕараадаланнылар.
Баҕа өттүнэн баһаары умуруорааччылары Арассыыйа ЫБММ Саха сиринээҕи Кылаабынай управлениетын начаалынньыга, ис сулууспа генерал-майора Павел Гарин эҕэрдэлээтэ уонна махталын биллэрдэ.
Тэрээһин түмүгэр Кылаабынай управление уонна Бүтүн Арассыыйатааҕы баҕа өттүнэн үлэлиир баһаарынай уопсастыба регионнааҕы салаатын икки ардыгар бииргэ үлэлиир туһунан сөбүлэҥ түһэрсилиннэ.
Сонуннар
Ордук ааҕаллар
