Ыарыыны сэрэтии – хас биирдиибит ытык иэспит буолла

Коронавирус тарҕаныытын босхор хааччахтар сыыйа сымнаан эрэллэр – Арассыыйа бэйэ изоляциятыттан тахсар суолу тутуста. Ол эрээри биһиги өрөспүүбүлүкэбитигэр ыарыһах ахсаана улаханнык аҕыйыы илик.

Дьаҥ туруоҕуттан бүгүн бу ыарыыттан ыарахан турукка сытар дьон ахсаана хаһааҥҥытааҕар да элбээтэ – 33 киһи буолла, хаһааҥҥытааҕар да элбэх көрдөрүү -  11 киһи тыынар аппараакка холбонно. Коронавирустан 26 киһи сырдык тыына быһынна.

Тэрилтэлэр үлэһиттэрин доруобуйатын кыраҕытык кэтээн көрүөхтээхтэр. Тумуулаабыт, ыарыы сибикилээх, температуралаах дьону үлэлэриттэн туоратыахтаахтар. Маҕаһыыннарга уонна да атын өҥөнү оҥорор сирдэргэ мааската суох дьону киллэриэ суохтаахтар.

Коронавирус инфекцията тарҕаныытын утарар уонна бохсор сыалтан ылыллар нуорма-быраап акталарын тутуһууга эппиэтинэһи сүгүүгэ Регионнааҕы КоАП-ка саҥа ыстатыйа эбилиннэ. Коронавирус инфекциятын кэмигэр ирдэбиллэри тутуспатахтарга боротокуол оҥоруутун бырааба муниципальнай административнай хамыыһыйаларга сүктэрилиннэ.

Административнай дьыала оройуоннар уонна куораттар административнай хамыыһыйаларынан биирдиилээн уонна юридическай сирэйдэргэ толоруллар. Өскөтүн кинилэр дьайыылара холуобунай накаастабылы сүкпэт буоллахтарына эрэ олоххо киирэр.

Сокуонунан ыстараап олохтонор:

• Биирдиилээн дьоҥҥо: 1000-4000 солк;
• Дуоһунастаах сирэйгэ: 15000-40000 солк;
• Юридическай сирэйгэ: 200 тыһ. солк. – 300 тыһ. солк.

Иккистээн буруйу кэһэр түгэҥҥэ:

• Биирдиилээн дьоҥҥо: 4000-5000 солк;
• Дуоһунастаах сирэйгэ: 40000- 50000 солк;
• Юридическай сирэйгэ: 300 тыһ. солк. -500 тыһ. солк.